Charter Document - 02120124

Universis presentes literas inspecturis frater Milo prior humilis de Charitate salutem in Domino Noveritis quod nos damus et concedimus pure et imperpetuum donatione irrevocabili facta solemniter inter vivos animo obligandi nos et successores nostros per donationem hujusmodi et per continentiam presentium literarum venerabili ac religioso conventui nostro de Charitate et eorum successoribus pro anniversario nostro in nostra Charitatensi ecclesia solemniter et perpetuo celebrando ad pitantiam ipsi conventui die obitus et anniversarii nostri plenarie faciendam decem libras annui redditus et unum dolium vino plenum duos modios continens ad mensuram Charitatis percipiendas et habendas annis singulis in festo beatorum Germani et Remigii super censu nostro de Carquoto quem emimus et acquisivimus a Stephano dicto Chabut et Bernardo de Porta veteri militibus qui census appellatur census domini Roberti de Bosco et levatur et percipitur annis singulis in festo Pentecostes nativitatis sancti Joannis Baptiste et in festo beatorum Germani et Remigii et dictum dolium vini percipiendum et habendum a dicto conventu in cellario nostro de vino clausi quem emimus a defuncto Alardo clerico ad usum ipsius conventus die obitus et anniversarii nostri Damus etiam et concedimus dicto conventui pure et in perpetuum furnum nostrum de Vevra quem acquisivimus et construximus devestientes nos ex nunc de predictis rebus donatis et investientes dictum conventum per traditionem presentium literarum animo in ipsum conventum possessionem proprietatem et verum dominium rerum donatarum totaliter transferendi promittentes bona fide quod contra donationem ipsam seu contra aliquod de premissis per nos sive per alium de cetero nullatenus veniemus In cujus rei testimonium dicto conventui dedimus et concessimus presentes literas sigilli nostri munimine roboratas Datum anno Domini millesimo ducentesimo septuagesimo quarto die mercurii post Epiphaniam Domini