Charter Document - 02120054

Jean filz de Roy de France duc de Berry et d'Auvergne à nos bailly et receveur de Bourges et à tous nos autres officiers ou à leurs lieutenans salut Ouye la supplicacion de nos bien amez les religieux prieur et couvent de La Charité sur Loyre contenant comme ils ayent accoustumé de prendre et avoir chascun an sur les moulins que l'on dit les moulins le Roy à Bourges seize muids de froument à la mesure du lieu et de mettre de par eulx esdiz moulins le premier jour de Caresme un de leurs gens ou officiers qui aye une des clefs de la huche où l'en met le froument que iceux moulins gaignent et ne s'en part jusques à ce que lesdiz religieux soient payez entièrement desdiz seize muids froument et de ces choses ayent esté et soient en possession et saisine et en ont joui et usé paisiblement de tel et si long temps qu'il n'est memoire du contraire et il soit ainsy que lesdiz moulins qui d'ancienneté ont esté et sont du domaine de nostre duché lesqueiz souloient tenir en sa main le Borgne de Levis soient de nouvel venus en nostre main et en ayons à present les proffitz et emolumens et pour ce soyons tenus de payer ce en quoi ils sont chargez envers lesdiz religieux et combien que par certain temps que lesdiz moulins ont esté en nostre main par deffault d'homme et en ayant reçeu les proffiz lesdiz religieux ayent joui et usé paisiblement de leur droit possession et saizine dessusdicte au veu et au sceu de nos gens et officiers et non contredisans neantmoins vous ou aucun de vous en ceste presente année avez contredit et refusé de laisser lesdiz religieux jouir et user de leur droit possession et saizine en la maniere qu'ils ont accoustumée et de leur payer ladicte rente disans que sans avoir mandement de nous sur ce ne l'ausiez bonnement faire si comme lesdiz religieux disent en nous supplians comme ladicte rente ils ayent jouy paisiblement par le temps dessusdict jusques a ceste année et ayent moult perdu par le faict des guerres que sur ce leur voulions pourvoir de gracieux remede Nous considéré ce que dit est qui ne voulons les droicts des eglises estre diminués mais iceulx accroistre vous mandons et a chascun de vous si comme a luy appartiendra estroittement enjoignons en commenttant si mestier est que s'il vous appert deuement des choses dessusdictes lesdiz religieux et leurs gens vous faites souffrez et laissez jouir et user paisiblement de leur rente saizine et possession dessusdicte en leur souffrant et laissant prendre et estre payez de leur dicte rente doresnavant en la maniere et selon qu'il vous apparoistra avoir faict lesdiz religieux avantque lesdiz moulins feussent dernierement mis en nostre main en ostant tout empeschement qui par vous ou aucun de vous y auroit sur ce esté mis se aucun y en avoit lequel en ce cas nous ostons par ces presentes nonobstant nos ordonnances mandemens ou deffenses faictes ou a faire au contraire Donné à Paris le dixiesme jour de mars l'an de grace mil trois cent soixante et cinq sous le scel de nostre secret en l'absence de nostre grand Par monsieur le duc et à la relacion de l'evesque de Nevers signé de Chery et scellé en cire rouge aux armes du duché de Berry qui sont semé de France