Charter Document - 02120036
| Charter Number: | 02120036 |
|---|---|
| Cartulary Title: | Cartulaire du prieuré de la Charité-sur-Loire (Nièvre), Ordre de Cluni |
| Charter Language: | Latin |
| Charter Origin: | Religious |
| Charter Type(s): | Agreement |
| Date: | 1225 |
| Date type: | Internal, A.D. |
| Resource Link(s): |
|
Charter:
Ego Matildis comitissa Nivernensis notum facio universis quod cum domus de Charliaco que specialiter spectat ad ecclesiam de Charitate haberet usagium suum plenarium ad omnia necessaria dicte domus tam intra quam extra generaliter ministranda et haberet medietatem in panagio et haberet tertiam partem in censu nemoris de Crisot prout nobis constat ex confessione utriusque partis et super iis multoties emersa fuisset questio inter decanum dicte domus de Charliaco ex una parte et Gualterium de Piscibus militem et Guidonem et Radulfum fratres ejus et Mariam relictam Hugonis de Piscibus militis quondam fratris eorumdem et Vuillelmum filium dicti Hugonis ex altera Tandem mediante bonorum virorum consilio pro bono pacis et pro utilitate utriusque partis compositio intercessit in hunc modum Decanus predicte domus de Charliaco et quicumque dictam domum tenuerit non mutato predicto usagio habebit absque ulla contradictione quintam partem totius predicti nemoris in panagio in censu in forestagio in forifactis et in omnibus aliis expletis cum particibus antedictis ita quod ibidem de communi assensu custos apponetur et quod nullus predictorum in dicto memore cum dicto decano participantium aliquid vendere sive dare vel accensare poterit de ipso nemore sine assensu prioris de Charitate Et quandocunque prior de Charitate voluerit dicti participes vel eorum heredes tenentur et tenebuntur partiri nemus antedictum in quinque partes et dictus prior vel ejus mandatum [quintam partem] acceptabit et illam quintam partem dicta domus de Charliaco libere quiete et pacifice et absque omnimoda contradictione in hereditatem perpetuam possidebit Dictus vero prior de Charitate vel decanus de Charliaco in aliis quatuor partibus nemoris predicti nihil omnino poterunt reclamare sicut nec dicti participes in quinta parte Hanc etiam partitionem facere poterunt dicti participes vel heredes eorum quandocunque voluerint et dicti prior aut decanus non poterunt partitionem impedire sed percipient illam de quinque partibus quam optabunt Hanc autem compositionem firmiter et inviolabiliter tenendam et servandam dicti Galterius Guido Radulfus Maria et Vuillelmus juramento tactis sacrosantis Evangeliis coram nobis corporaliter prestito firmaverunt Pro hac autem compositione decanus dicte domus de Charliaco dedit predictis participibus decem libras Nivernensis monete quas eis persolvit Et sciendum quod domus de Charliaco omnia supradicta ex dono et eleemosyna antecessorum predictorum participum est assecuta Nos autem ad petitionem utriusque partis presentem paginam sigilli nostri fecimus munimine roborari Anno gratie millesimo ducentesimo vicesimo quinto mense martii