Charter Document - 02120028

In nomine Domini amen Per hoc presens instrumentum publicum cunctis pateat evidenter et sit manifestum quod anno ejusdem Domini millesimo quadringentesimo tricesimo octavo more gallicano sumpto die vero mensis januarii vicesima septima hora nona vel quasi ante meridiem in ecclesia beate Marie de Charitate supra Ligerim Autissiodorensis diocesis juxta altare retro magnum altare dicte ecclesie existens et super quo missa matutinalis consuevit ab antiquo celebrari in nostrorum notariorum ac testium infrascriptorum presentia constitutus reverendus in Christo pater et dominus Laurentius divina permittente clementia Autissiodorensis episcopus quiquis sua mera sponte et voluntate religioso viro et honesto domno Petro Ducis dicte ecclesie et dicti monasterii suppriori vicarioque generali reverendi in Christo patris domni Theobaldi Doeti dicti de Charitate prioris ac pluribus aliis personis tam religiosis quam non religiosis huc assistentibus loquendo et verba sua dirigendo dixit protulit cognovit et veraciter affirmavit in hunc modum Domini et amici mei ecce ego presentialiter ibidem ac in isto loco de sacris equa ordinibus celebravi veluti equos tam religiosos istius monasterii quam alios in accolytatu ordine ordinando et quia monasterium istud et ecclesia ista sunt exempte a lege nostra diocesana et jurisdictione non possimus nec debemus in ipsa sacros ordines celebrare nisi de voluntate et assensu religiosorum ipsius monasterii et ecclesie nos vobis intimamus et certificamus quod nos omnia et singula que nunc in ipsa ecclesia in iis et cetera hec fecimus et egimus nos ipsa fecimus de libertate voluntate et licentia vicarii prioris ante dicti monasterii istius qui ad hoc faciendum favore antiquorum ipsius monasterii religiosorum qui ad dictum ordinem sunt promoti istud altare et locum istum pro vice ista solummodo et dumtaxat nobis concessit nec est nostre intentionis propter istud aliquod jus vel aliquam possessionem contra religiosos istius antedicti monasterii nec contra eorum privilegia jura et libertates aliquid acquirere sed volumus et concedimus dictos religiosos in suis privilegiis juribus et exemptionibus predictis non obstante illibatos remanere ac si dictos ordines in hoc loco nullatenus fecissemus et ordinassemus De quibus omnibus et singulis supradictis dictus vicarius pro dicta ecclesia et ipsius prioris nomine petiit a nobis notariis instrumentum sibi super hec fieri et confici quod sibi concessum fuit sub hac forma presentibus ibidem et assistantibus venerabilibus et circumspectis viris et magistris Jocelino Couriarret in legibus licenciato Joanne Araby Joanne Charleu presbyteris Joanne de Dijon Joanne Douvanne Joanne Gileti et pluribus aliis testibus ad hoc specialiter convocatis et rogatis Et ego Nicolaus Thome presbyter Trecensis diocesis canonicusque beate Marie in civitate Autissiodorensi publicus apostolica ipsiusque reverendi authoritate notarius juratus quia premissis omnibus et singulis dum sicut premittitur agerentur dicerentur et fierent una cum notario infrascripto et testibus superius nominatis presens fui eaque sic fieri vidi dici et audivi et in publicam formam redegi ex qua hoc presens publicum instrumentum manu mea fideliter scriptum extraxi in fidem et testimonium omnium et singulorum premissorum Sic signatum Thome Et ego pariter Joannes Guinardi Autissiodorensis canonicus publicusque imperiali authoritate notarius quia premissis omnibus et singulis dum sic ut premittitur fierent dicerentur et agerentur una cum notario suprascripto et testibus prenominatis presens fui eaque sic fieri vidi et audivi ideo hoc presens instrumentum manu aliena fideliter scriptum signavi signumque meum solitum in talibus fieri consuetum posui in testimonium premissorum requisitus et rogatus Sic signatum J Guinardi