Charter Document - 02120022

Innocentius episcopus servus servorum Dei dilectis filiis priori et conventui monasterii de Charitate Cluniacensis ordinis Autissiodorensis diocesis salutem et apostolicam benedictionem Paci et tranquillitati vestre ac monasterii vestri obtentu precum dilecti filii magistri Pauli de Sancto Helia canonici Baiocencis nostri et vestri devoti paterna volentes solicitudine providere authoritate vobis presentium indulgemus ut per literas apostolicas vel legatum apostolice sedis prioratus domus maneria beneficia et alia ad vestram collationem seu patronatum spectantia conferri non possint alicui vosque ad receptionem vel provisionem alicujus compelli minime valeatis etiamsi contineatur in eisdem literis ut aliqua indulgentia non obsistat Nos enim decernimus irritum et inane quidquid contra hujusmodi indulgentie nostre tenorem factum fuerit per quemcunque ac excommunicationis suspensionis et interdicti sententias si quas in vos vel monasterium vestrum aut aliquos vobis subditos fieri nostra vel quavis authoritate contigerit penitus non tenere Nulli ergo omnino hominum liceat hanc paginam nostre concessionis et constitutionis infringere vel ei ausu temerario contra ire si quis autem hoc attentare presumpserit indignationem omnipotentis Dei et beatorum Petri et Pauli apostolorum ejus se noverit incursurum Datum Laterani secundo kalendas aprilis pontificatus nostri anno undecimo