Charter Document - 02120018

Paulus episcopus servus servorum Dei universis Christi fidelibus presentes literas inspecturis salutem et apostolicam benedictionem Salvatoris eterni qui pro humano redimendo genere in ara crucis immolari non abnuit vices licet immeriti gerentes in terris ad id nostri vota cordis desideranter exponimus ut quos ipse pretiosissimi sanguinis aspersione reconciliare Deo curavit quorumque regimen et gubernationem nobis commisit ad pietatis charitatis et misericordie continuo exercenda aliaque salubria et meritoria opera quibus de terrenis immarcessibiles thesauros recondere nec non patrie celestis possessores effici possint frequenter excitemus Cum itaque sicut accepimus in Ecclesia prioratus conventualis et vere electivi Beate Marie de Charitate supra Ligerim ordinis sancti Benedicti Autissiodorensis dioecesis una pia utriusque sexus Christi fidelium con fraternitas sub invocatione sanctissimi nominis Jesu ad Dei omnipotentis laudem et animarum salutem proximique subventionem non tamen pro hominibus unius specialis artis canonice instituta existat cujus dilecti filii confratres quam plurima pietatis charitatis et misericordie opera exercere consueverunt Nos cupientes ut predicti ac pro tempore existentes ejusdem confraternitatis confratres in hujusmodi piorum operum exercitio confoveantur ac magis ad ea impostorum exercenda nec non alii Christi fideles ad dictam confraternitatem ingrediendam per amplius invitentur dictaque ecclesia et in ea situm altare ipsius confraternitatis in debita veneratione habeantur et ab ipsis Christi fidelibus congruis frequententur honoribus illique vero libentius ad ecclesiam et altare hujusmodi devotionis causa confluant quo ex hoc dono celestis gratie uberius conspexerint se esse refectos de omnipotentis Dei misericordia ac beatorum Petri et Pauli apostolorum ejus authoritate confisi omnibus et singulis utriusque sexus Christi fidelibus vere penitentibus et confessis qui dictam confraternitatem de cetero ingredientur die primi illorum ingressus si sanctissimum Eucharistie sacramentum sumpserint nec non tam ipsis quam ad presens et pro tempore existentibus dicte confraternitatis confratribus et vere penitentibus et si fieri poterit confessis ac sacra communione refectis alias saltem contritis in eorum mortis articulo nomen Jesu corde si ore nequiverint invocantibus indulgentiam plenarium ipsisque confratribus similiter vere penitentibus et confessis sacraque communione refectis qui ecclesiam predictam in die festo ejusdem sanctissimi nominis Jesu die quarta decima januarii a primis vesperis usque ad occasum solis diei hujusmodi singulis annis devote visitaverint et inibi pro heresium exstirpatione et salute Romani pontificis ac hereticorum conversione sancteque matris Ecclesie exaltatione et inter principes Christianos servanda pace concordia et unione pias ad Deum preces effuderint quo die predicto id fecerint et plenarium indulgentiam et omnium peccatorum suorum remissionem apostolica authoritate tenore presentium misericorditer in Domino concedimus et elargimur Preterea eisdem confratribus qui similiter vere penitentes et confessi ac sumpto eodem sanctissimo Eucharistie sacramento ecclesiam predictam in Assumptionis Nativitatis ac conceptionis et Annunciationis Beate Marie virginis festivitatibus etiam a primis vesperis usque ad occasum solis singularium festivitatum hujusmodi visitaverint septem annos et totidem quadragenas Quoties vero divinis officiis in eadem ecclesia celebrandis aut congregationibus publicis vel secretis pro quocumque pio opere exercendo aut processionibus ordinariis et extraordinariis tam predicte confraternitatis quam aliis quibuscumque de licentia ordinarii celebrandis aut sepeliendis mortuis officiose interfuerint vel dictum sanctissimum Eucharistie sacramentum dum ad aliquem infirmum defertur associaverint aut qui facere impediti campane ad id signo dato genibus flexis semel orationem dominicam et salutationem angelicam pro dicto infirmo recitaverint seu devium aliquem ad viam salutis reduxerint et ignorantes Dei precepta et alia que ad salutem sunt docuerint et ex hujusmodi piis operibus aliquod egerint toties sexaginta dies de injunctis eis aut alias quomodo libet debitis penitentiis authoritate et tenore presentium etiam misericorditer in Domino relaxamus presentibus perpetuis futuris temporibus duraturis Volumus autem quod si dicta confraternitas alicui archiconfraternitati aggregata sit vel in futurum aggregetur seu quavis ratione pro illius indulgentiis consequendis aut de illis participandis uniatur vel alias quomodo libet instituatur priores seu quevis alie litere preter presentes nullatenus suffragentur sed ex tunc prorsus nulle sint eo ipso Quod si supradicte ecclesie aliqua alia indulgentia perpetuo vel ad tempus nondum elapsum duratura per nos concessa fuerit eedem presentes nullius sint roboris vel momenti Datum Rome apud sanctum Petrum anno Incarnationis Dominice millesimo sexcentesimo septimo idibus decembris pontificatus nostri anno tertio