Charter Document - 02120014

Alexander episcopus servus servorum Dei dilectis filiis sancte Columbe Senonensis et sancti Satiri Bituricensis diocesis abbatibus salutem et apostolicam benedictionem Olim pie memorie Innocentius papa predecessor noster cuilibet venerabilium fratrum nostrorum archiepiscopi Senonensis ejusque suffraganeorum sigillatim sub certa forma suis dedit literis in preceptis ut statuta pro reformatione ordinis sancti Benedicti a felicis recordationis Gregorio papa predecessore nostro edita facerent ab universis personis ejusdem ordinis suarum diocesium exacta diligentia observari Quarum litterarum authoritate quidam ipsorum super hoc diligenter preceptum apostolicum exequentes in membra monasterii de Charitate Cluniacensis ordinis Autissiodorensis diocesis ut dicitur processerunt in priores et monachos membrorum ipsius excommunicationis et in eorum ecclesiis interdicti sententiis promulgatis Quia vero dilecti filii prior et conventus ipsius monasterii super iis ad apostolice sedis providentiam recurrerunt eosdem archiepiscopum et suffraganeos rogandos duximus et monendos eis universis et singulis nostris dantes literis in mandatis ut processum ipsorum super hoc contra priores et monachos predictos eorumdem membrorum dictarum diocesium habitum revocantes per seipsos et hujusmodi sententias sine difficultate qualibet relaxantes dispensent cum prioribus et monachis predictis super irregularitate si quam exinde contraxerunt ac eos predictarum literarum authoritate ulterius non molestent sed eis quantum in ipsis fuerit exhibeant se favorabiles et benignos Ita quod eorum devotio possit exinde merito commendari Quocirca discretioni vestre per apostolica scripta mandamus quatenus si dicti archiepiscopus et suffraganei mandatum nostrum neglexerint adimplere vos vel alter vestrum per vos vel per alium aut alios super hoc mandatum apostolicum exequi procuretis contradictores authoritate nostra appellatione postposita compescendo non obstante si aliquibus a sede sit indultum eadem quod interdici suspendi vel excommunicari aut extra suam civitatem vel diocesim in causam trahi non possint per literas apostolicas non facientes plenam et expressam ac de verbo ad verbum de indulto hujusmodi mentionem et qualibet alia ipsius sedis indulgentia eis aut alicui eorum aut aliis quibuscumque personis sub quacumque forma verborum vel expressione concessa per quam non expressam nostris literis vel totaliter non insertam adimpleri valeat vel differri et constitutione de duabus dietis edita in concilio generali Datum Anagnie idibus julii pontificatus nostri anno primo