Charter Document - 02120010
| Charter Number: | 02120010 |
|---|---|
| Cartulary Title: | Cartulaire du prieuré de la Charité-sur-Loire (Nièvre), Ordre de Cluni |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1255 |
| Date type: | Internal, Calendar, Papal |
| Resource Link(s): |
|
Charter:
Alexander episcopus servus servorum Dei dilectis filiis priori et conventui monasterii de Charitate Cluniacensis ordinis Autissiodorensis diocesis salutem et apostolicam benedictionem Religionis vestre meretur honestas ut nos favore apostolico prosequentes petitiones vestras quantum cum Deo possumus ad exauditionis gratiam admittamus Sane petitio vestra nobis exhibita continebat quod felicis recordationis Gregorius papa predecessor noster olim diligenter considerans quod si a monasteriis Cluniacensis ordinis passim et absque rationabili causa contingeret amoveri priores magnum poterat monasteriis ipsis parari dispendium Cum novitates interdum pariant detrimentum duxit salubriter statuendum quod quandiu priores ipsius ordinis tam in spiritualibus quam in temporalibus bene administrare constiterit non nisi ex certis causis in eodem statuto expressis possint vel debeant a suis monasteriis amoveri Cum igitur sicut asseritis prioratus vester de Charitate inter alios predicti ordinis prioratus unus de majoribus et honorabilioribus habeatur supplicastis nobis ut te fili prior et alios qui tibi successerint ab eodem prioratu contra prefati predecessoris nostri statuta nulli liceat amovere Nos itaque attendentes quod ea que per predecessorem eumdem provide statuta esse noscuntur non sunt temeritate cujuspiam infringenda vestris justis supplicationibus inclinati authoritate vobis presentium indulgemus ut tu fili prior et successores tui non nisi ex causis in eisdem statutis contentis coram definitoribus generalis capituli Cluniacensis rite secundum eadem statuta lectis propositis et probatis legitime ab abbate Cluniacensi seu quocunque alio ab administratione prioratus ipsius possitis aliquatenus amoveri Et si forsan vos super iis contra justitiam gravari contigerit licitum sit vobis propter hoc sedem apostolicam appellare non obstante si in eisdem statutis est cujuslibet appellationis remedium interdictum Nulli ergo omnino hominum liceat hanc paginam nostre concessionis infringere aut aliquo ausu temerario contra ire Si quis autem hoc attentare presumpserit indignationem omnipotentis Dei et beatorum Petri et Pauli apostolorum ejus se noverit incursurum Datum Neapoli XV kalendas aprilis pontificatus nostri anno primo