Charter Document - 02120009
| Charter Number: | 02120009 |
|---|---|
| Cartulary Title: | Cartulaire du prieuré de la Charité-sur-Loire (Nièvre), Ordre de Cluni |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1204 |
| Date type: | Internal, Papal |
| Resource Link(s): |
|
Charter:
Innocentius episcopus servus servorum Dei dilectis filiis priori et conventui de Charitate salutem et apostolicam benedictionem Si justa filii hominum judicarent et animadverterent diligenter impensam sibi gratiam redemptoris qui pro nobis tradidit semetipsum usque ad mortem factus obediens ut nos de inimici faucibus liberaret sanctam ecclesiam sponsam ejus quam ipse proprio sanguine dedicavit et in ea domino famulantes studerent propensius honorare atque a lesione ipsorum suas retraherent penitus voluntates Verum quod dolentes referimus tanta est peccatis exigentibus nunc malitia hominum super terram et in tantum excrevit audacia malignantium quod non solum ad res ecclesiasticas avidas manus extendunt et pro suo diripiunt arbitrio voluntatis imo etiam ecclesias et possessiones earum quasi signum ad sagittam ponentes viros religiosos odio execrabili prosequuntur sanctum eorum otium nequiter perturbantes Et quoniam hujusmodi homines licet censeantur nomine Christiani a Christi tamen operibus sunt alieni letantes cum malefecerint et in rebus pessimis exultantes et admoniti sepius a sua nolunt desistere pravitate nolentes intelligere ut bene agant sed iniquitatem in suis cubilibus meditantes cum malefactoribus ipsis sicut vestra relatione didicimus per vos resistere non possitis mos in vestra ecclesia inolevit ut cum aliquis malefactor res monasterii vestri occupat per violentiam vel diripit per rapinam et monitus vobis satisfacere non procurat vos in missarum solemniis cum patri filius pro mundi reatibus immolatur ecclesie pavimento pro sternitis et pro persequentibus exoratis oculos levantes ad Dominum et humiliter supplicantes ut vestri misereri dignetur qui prope est invocantibus ipsum in veritate timentium se peragit voluntates et orationes exaudit eorum faciens eos salvos Cum igitur orare pro persequentibus non solum precepto verum etiam exemplo dominico instruamur nos premissam consuetudinem piam esse credentes presentium vobis authoritate concedimus quatenus eam minime deseratis sed ipsam humiliter ac devote servetis ita quod orationibus vestris a malo revocentur iniqui vosque optata pace fruamini ac quiete Datum Laterani II idus aprilis pontificatus nostri anno septimo