Charter Document - 02120008
| Charter Number: | 02120008 |
|---|---|
| Cartulary Title: | Cartulaire du prieuré de la Charité-sur-Loire (Nièvre), Ordre de Cluni |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1192 |
| Date type: | Internal, A.D., Papal |
| Resource Link(s): |
|
Charter:
Cœlestinus episcopus servus servorum Dei venerabili fratri Senonensi archiepiscopo et dilecto filio abbati sancte Columbe in Senonensi diocesi constituto salutem et apostolicam benedictionem Ex insinuatione dilectorum filiorum abbatis et conventus Cluniacensis nos accepisse noveritis quod cum prioratus eorum de Charitate tempore quo carissimus in Christo filius noster Philippus illustris Francorum rex Hierosolymam profectus est Dei providentia et peccatis habitantium exigentibus nimio fuisset debitorum onere aggravatus et Petrus de Corzon serviens nobilis viri comitis Nivernensis nimium ipsum affligeret et gravaret prior et fratres ejusdem loci domum de Coulongiis ad ipsum prioratum spectantem pro tredecim mille solidorum Nivernensium ipsi Petro venditioni exponere sunt coacti Unde prioratus de Charitate damnificatus est plurimum et gravatus Et licet ipse Petrus ad instantiam predicti Cluniacensis abbatis postmodum in præsentia venerabilis fratris nostri Wuidonis Rhemensis archiepiscopi sancte Sabine cardinalis apostolice sedis legati tunc curam et solicitudinem regni Francie simul cum carissima in Christo filia nostra illustri Regina Francorum matre Regis ipsius gerentis tactis sacrosanctis evangeliis juramento firmaverit quod priori et fratribus de Charitate recepta pecunia sua domum pretaxatam cum omnibus pertinentiis redderet pacifice possidendam nunquam postmodum quamvis ipsi fratres ut dicitur pecuniam illam ei vellent restituere illud quod juraverat noluit adimplere Cum igitur cura et solicitudo omnium ecclesiarum sit nobis commissa volentes indemnitati ipsius prioratus de Charitate prout debemus paterno affectu solicite providere discretioni vestre per apostolica scripta mandamus firmiter injungentes quatenus supradictum comitem Nivernensem qui eamdem domum de Colonges servientis nomine sicut dicitur occupavit et in proprios usus convertit vel ipsum servientem si predicta domus ei fuerit restituta authoritate nostra monere et induere efficaciter laboretis ut domum ipsam prioratui supradicto recepta ab ipsis pecunia pretaxata sine difficultate qualibet restituere non omittant et si quid in ipsa domo ab ipso comite vel predicto serviente superedificatum est non computetur ipsis fratribus sed de redditibus domus ipsius interim receptis illud fiat si vero idem comes vel ipsius serviens duxerint resistendum vos nostra freti authoritate tam ipsum comitem quam quoslibet alios domum ipsam tenentes ad eamdem domum cum pertinentiis prefatis fratribus resignandam per excommunicationis et interdicti sententias sublato contradictionis et appellationis obstaculo compellatis facientes utramque sententiam usque ad condignam satisfactionem inviolabiliter observari nullis litteris obstantibus harum tenore tacito a sede apostolica impetratis Quod si ambo iis exequendis nequiveritis interesse tu frater archiepiscope ea nihilhominus exequaris Datum Laterani VIII idus augusti pontificatus nostri anno secundo