Charter Document - 02120007

Alexander episcopus servus servorum Dei dilectis filiis nostris priori Sancti Juliani de Sezanna ejusque fratribus regularem vitam professis imperpetuum Religiosam vitam eligentibus apostolicum convenit adesse presidium ne forte cujuslibet temeritatis incursus aut eos a proposito revocet aut robur quod absit sacre religionis infringat Ea propter dilecti in Domino filii vestris justis postulationibus clementer annuimus et prefatum monasterium in quo divino mancipati estis obsequio sub beati Petri et nostra protectione suscipimus et presentis scripti privilegio communimus statuentes ut quascunque possessiones quecunque bona idem monasterium impresentiarum juste et canonice possidet aut in futurum concessione pontificum largitione regum vel principum oblatione fidelium seu aliis justis modis prestante Domino poterit adipisci firma vobis vestrisque successoribus et illibata permaneant In quibus hec propriis duximus exprimenda vocabulis Ecclesiam de Sclavella quam Philippus Trecensis episcopus presentibus et laudantibus ecclesie sue clericis eidem monasterio contulit Ita tamen quod ipsi monachi mediam partem offerende que offertur in ipsa ecclesia accipiant tam in denariis quam in panibus et in cera et in candelis et in aliis quibuslibet rebus et in carruca sua propria habeant monachi totam decimam Si quando monachus missam cantare voluerit post missam presbyteri cantabit et si quid ei delatum fuerit suum erit Ecclesiam quoque de Gaux cum appenditiis suis Decimas quoque quas Paganus de Aula et Bazo milites de Sezanna Hatoni Trecensis ecclesie episcopo bone memorie viro reddiderunt et episcopus eidem monasterio pie devotionis titulo contulit et confirmavit Quidquid Paganus de Aula in majori decima de Bucinciaco habuerat Similiter quidquid Bazo in majori seu minori decima de Sancto Remigio detinebat rationabiliter monasterio vestro collatum Preterea compositionem quam cum canonicis ecclesie Sancti Nicolai super querelis que inter vos et eos vertebantur mediante bone memorie Trecensi episcopo et nobili viro comite Henrico et Odone decano Sancti Nicolai fecistis sicut absque pravitate de assensu utriusque partis facta est et hinc inde suscepta authoritate apostolica confirmamus quam de verbo ad verbum sicut visum est expedire duximus ad notandum Hato Dei gratia Trecensis ecclesie humilis minister et Henricus Trecensis comes Palatinus et Odo decanus ecclesie Sancti Nicolai totusque ejusdem ecclesie conventus Savarico priori de Charitate omnique ejusdem ecclesie conventui in Domino salutem Notum fieri volumus tam presentibus quam futuris quod querelam que inter vos et canonicos ecclesie Sancti Nicolai Sezannie super eadem ecclesia habebatur hac compositione utrique parti placuit terminari duplicis prebende beneficium ex integro et absque ulla imposterum diminutione fratres vestri in ecclesia Sancti Juliani Deo servientes ac successores eorum ab ipsis canonicis et successoribus eorum omni anno quibus et ceteri canonici temporibus recipient Ita tamen quod in ecclesia Sancti Nicolai duas hebdomadas in missa tantum facient et computationibus intererit prior aut cui ex parte ejus id jussum fuerit et quocunque modo cujuscunque canonici persona mutetur in prefata ecclesia Sancti Nicolai ejus prebendam per annum ex integro monachi habebunt et pro eo in eadem ecclesia prebendam facient in missa tantum jus quoque parrochiale exclusis ab omni parte ab eo canonicis monachis tantum et eorum parrochialibus presbyteris totum ut antiquitus remanebit statutum etiam quod canonici nihil de propriis monachorum vel hominum eorum dono vel emptione vel liberalitate ab aliquo datum recipient quod damnosum monachis probetur Hoc etiam monachi erga canonicos observabunt Nec licebit canonicis res ecclesie Sancti Nicolai vendere vel dilapidare absque scitu et concilio prioris Si autem aliquis canonicorum in habitu clericali Sezannie obierit in cimeterio sancti Juliani sepelietur Scolas quoque infra terminum parrochie nemo regere presumet nisi prius a priore licentia fuerit expetita Porro neque absque ejusdem prioris consensu aliquis parrochialium presbyterorum in canonicum recipietur Quod si forte alium statum ordo qui nunc est canonicorum transierit omnes ecclesie Sancti Nicolai possessiones monachi de Charitate gratis et absque ulla contradictione recipient et ex integro possidebunt Decernimus ergo ut nulli omnino hominum liceat prefatum monasterium temere perturbare aut ejus possessiones auferre vel ablatas retinere minuere seu quibuslibet molestiis fatigare sed omnia integra conserventur eorum pro quorum gubernatione et sustentatione concessa sunt usibus omnimodis profutura salva sedis apostolice authoritate et diocesani episcopi justitia Si qua igitur in futurum ecclesiastica secularisve persona hanc nostre constitutionis paginam sciens contra eam temere venire tentaverit secundo tertiove commonita si non satisfactione congrua emendaverit potestatis honorisque sui dignitate careat reamque se divino judicio existere de perpetrata iniquitate cognoscat et a sacratissimo corpore et sanguine Dei et Domini redemptoris nostri Jesu Christi aliena fiat atque in extremo examine districte ultioni subjaceat cunctis autem eidem loco justa servantibus sit pax Domini nostri Jesu Christi quatenus et hic fructum bone actionis percipiant et apud districtum judicem premia eterne pacis inveniant amen Datum Laterani per manum Alberti Romane ecclesie cardinalis et cancellarii VIII kalendas maii indictione XII Incarnationis Dominice anno MCLXXVIIII pontificatus vero Domini Alexandri pape III anno XX