Charter Document - 02110080
| Charter Number: | 02110080 |
|---|---|
| Cartulary Title: | Bullarium Sacri Ordinis Cluniacensis [Cluny] |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1027 |
| Date type: | Assigned |
| Resource Link(s): |
|
Charter:
Ioannes Episcopus servus servorum Dei Gausleno Episcopo Matisconensi salutem charissimam cum benedictione Apostolica Cui Deo auctore presidemus reliquarum Ecclesiarum caput et cardo sancta Romana Ecclesia tanto intolerabilius patitur quodcumque sibi ingeritur dedecus quanto unitati sue is a quo ingestum est videtur propinquior Ex quo ad Episcopalem gloriam deductus es Romane Ecclesie filius et discipulus visus es et tam a nobis quam ab Antecessoribus nostris amodo sic computatus es nunc vero nescimus qua nova temeritate illectus inextinguibili cupiditate accensus matri tue repugnas et contra nos meritis Apostoli Petri magistrum tuum levas calcaneum cum Cenobium Cluniacense cunctis pene nationibus sanctitate prefulgens necnon Apostolicis privilegiis fultum et ab omnium ditione subtractum solius Principis Apostolorum et Vicariorum suorum judicio reservatum commoves venerandum etiam infidelibus Patrem Domnum Odilonem Abb irreverenter appetis fratres ibidem degentes pro adipiscenda perpetua transitoriam quietem optantes sollicitas Apostolica privilegia cassare contendis quod ita accipimus quemadmodum si ipsa membra nostra avide discerpere quereres et quod sine ruina tua esse nequit Cave caute vel jam monitus anime et nostrum Monasterium singulare nobis relinque ne dum particeps ejus contra nos esse cupis Ordinis nostri exors Apostolica auctoritate efficiaris si vero aliqua competens ratio adversus eum te commovet nostrum judicium sub quo solo manet confidenter quere nos nempe qui eum tam a te quam et ab omnibus tuemur nulli prejudicium pretendere patimur