Charter Document - 02110078

Ioannes Episcopus servus servorum Dei Roberto Regi Francorum salutem charissimam cum benedictione Apostolica Quoniam o Religiosissime Rex multorum jam caritate frigescente superabundante autem iniquitate plurimis in locis non solum ab extraneis verum etiam ab iis qui filii nomine tenus dicuntur status Ecclesie confunditur sacre Religionis ordo contemnitur pietas et forma Justitie dehonestatur et privilegia Apostolica seu etiam Regalia precepta quantum ad substantiam illorum temeritate irreverenter cassantur oportet vestram sublimitatem vigilare ut in Regno vobis Deo auctore commisso Catholice fidei norma vigorem obtineat Sanctitas et Religio contra inimicos veritatis tropheum victorie insigniter teneat et sacer ritus predecentium Patrum inviolabiliter permaneat quatenus per hec et vestra fides plenitudinem bonorum percipiat et devotio subditorum exinde ad incrementa virtutum magis ac magis proficiat His enim rei Sacramentum non solum a nobis exigitur quibus Pastoralis commissa est cura verum etiam et a vobis cui credita est cum usuris exigenda maxima pompa et Regie sublimitatis potentia Quod enim sine gravi dicere non valemus dolore quibusdam vestrorum execrabili negotio ad Sacerdotium introductis non sufficit injuste adquisita posthabito Religionis ordine per perimendos terrene affectationis luxus distrahere nisi etiam et ea loca que a fidelibus qui illa ex propriis possessionibus et sumptibus construxere potestati solius Romane Ecclesie tradita sunt testamenti auctoritate ad damnationis sue cumulum sibi conentur defendere et suis usibus male applicare qui profecto ipsum caput discerpere gestiunt dum membra ab ipso separare volunt et eos quos ut vernaculos habet injuriis et contumeliis lacessere non desinunt ignorantes utique miseri quod hujus sancte Sedis decreta ita pia fide a filiis matris Ecclesie accipienda sunt et veneranda ut tanquam regule Canonum ab eisdem absque ullo scrupulo admittantur utpote que de omni Ecclesia fas habeat judicandi neque cuiquam liceat de ejus garrire decreto nec judicare judicio Cujus judicii sententiam eo magis oportet a nemine dissolvi quo certius Apostoli constat illam Petri firmitate et auctoritate solidari Ait enim quodam in loco Leo Papa venerabilis et sancte institutionis doctor admirabilis non parve insanie est contra eum aliquem mutire qui clavigerum Regni celestis habet Tutorem et Patronum quin eo magis si hic multa verba tumentis spiritus relaxentur ne forte Petri vindicta in posterum reservetur Horum itaque rabiem et tumoris insolentiam a nostris locis et maxime a Cluniensi Cenobio specialiter et singulariter nobis proprio procul amovere cupientes hoc privilegium Apostolica auctoritate filio nostro carissimo Odiloni et sibi succedentibus in perpetuum facere voluimus quod vestre nobilitati idcirco cum his litteris mittimus ut vestris vestrorumque Sacerdotum vel Optimatum in auribus recitetur preceptoque Regali et auctoritate firmetur corroboretur et auctorizetur ut nullius cujuscumque Sacerdotis vel Principis persona contra hoc Apostolice auctoritatis Decretum in perpetuum garrire vel mutire audeat ne Apostolico percussus anathemate districte ultionis penas luat et Regalis transgressor precepti cum suppliciis infernorum exsors etiam fiat temporalium bonorum