Charter Document - 02110073

Iulius Episcopus servus servorum Dei dilectis filiis sancti Illidii et sancti Rigaudi Claromontensis et Matisconensis diocesum Monasteriorum Abbatibus ac Priori Prioratus sancti Petri Matisconensis Salutem et Apostolicam benedictionem Dudum per felicis recordationis Clementem Papam sextum predecessorem nostrum ex conquestione tunc Abbatis et dilectorum filiorum Conventus Monasterii Cluniacensis ad Romanam Ecclesiam nullo medio pertinentis Matisconensis diocesis precepto quod nonnulli Archiepiscopi Episcopi et alii Ecclesiarum Prelati ac Clerici et Ecclesiastice persone tam Religiose quam seculares necnon Duces Marchiones Comites Barones Nobiles Milites et Laici communia Civitatum Universitates oppidorum Castrorum Villarum et aliorum locorum ac alie singulares persone Civitatum et Diocesum et aliarum partium diversarum occupaverant et occupari fecerant castra villas et alia loca terras domos possessiones et alia jura ac jurisdictiones necnon fructus census reditus et proventus ac omnium et singulorum Monasteriorum Prioratuum et singulorum aliorum Beneficiorum Ecclesiasticorum cum cura et sine cura secularium ac predicti ordinis Regularium ab eodem Monasterio Cluniacensi dependentium et nonnulla alia bona mobilia et immobilia spiritualia et temporalia ad Abbatem et Conventum predictos Clun et alia Monasteria Prioratus et Beneficia predicta spectantia et ea detinebant indebite occupata seu ea detinentibus prestabant auxilium consilium et favorem ac nonnulli etiam civitatum et diocesum ac partium predictarum qui nomen Domini in vanum recipere non formidabant eisdem Abbati et Conventui super predictis castris villis et locis aliis terris domibus et possessionibus juribus jurisdictionibus fructibus censibus reditibus proventibus eorumdem et quibuscumque aliis bonis mobilibus et immobilibus spiritualibus et temporalibus et aliis rebus ad Abbatem et Conventum Monasterii Cluniacensis et alia Monasteria Prioratus et Beneficia hujusmodi spectantibus multiplices molestias et injurias inferebant et jacturas Idem Clemens predecessor Abbatis et Conventus predictorum in ea parte supplicationibus inclinatus sancti Rufi prope Valentiam et Trenorchiensi ac sancti Andree Cabilonensis et Avenionensis diocesum Monasteriorum Abbatibus suis litteris dedit in mandatis quatenus etiamsi essent extra loca in quibus deputati essent conservatores et judices prefatis Abbati et Conventui efficacis deffensionis presidio assistentes non permitterent eosdem Abbatem et Conventum super iis et quibuslibet bonis et juribus ad ipsos Abbatem et Conventum Monasteria Prioratus et beneficia hujusmodi spectantibus ab eisdem vel quibusvis aliis indebite molestari vel eis gravamina seu damna irrogari prout in eisdem litteris plenius continetur Cum autem sicut exhibita nobis nuper pro parte dilecti filii moderni Abbatis et Conventus Monasterii Cluniacensis eorumdem petitio continebat sancti Rufi et Trenorchiensi ac sancti Andree Monasteriis predictis impresentiarum Abbates non presint sed illa certis personis Ecclesiasticis Apostolica auctoritate commendata sint pro parte eorundem Abbatis et Conventus nobis fuit humiliter supplicatum ut eis ne propterea dictarum litterarum frustrarentur effectu opportune providere paterna diligentia curaremus Quocirca discretioni vestre per Apostolica scripta mandamus quatenus si est ita ad executionem litterarum earumdem juxta illarum continentiam et tenorem et illarum forma servata procedatis in omnibus et per omnia perinde ac si ille vobis a principio directe fuissent Datum Viterbii anno Incarnationis Dominice millesimo quingentesimo sexto idus Martii Pontificatus nostri anno quarto