Charter Document - 02110069

Paulus Episcopus servus servorum Dei dilectis filiis Abbati sancti Rigaudi Matisconensis dioecesis et Decano Ecclesie Matisconensis Salutem et Apostolicam benedictionem Exposcit a nobis injunctum desuper Apostolice servitutis officium ut ea que pro Monasteriorum et aliorum Religiosorum locorum quorumlibet et in illis sub suavi religionis jugo Altissimo famulantur personarum commodo et utilitate provide sunt statuta ne cuiquam impugnationi subjaceant cum a nobis petitur Apostolici muniminis curemus presidio roborare Sane pro parte dilectorum filiorum Jacobi de Moussiaco Prioris majoris et Conventus Cluniacensis Romane Ecclesie immediate subjecti Matisconensis dioecesis nobis nuper exhibita petitio continebat quod diffinitores in generali Capitulo Cluniacensis ordinis ultimo celebrato juxta Apostolica privilegia dicto Monasterio concessa electi provide considerantes quod causantibus guerris que retroactis temporibus partes Francie afflixerunt multa incommoda Ordini predicto circa regularem observantiam subditorum obedientiam et Ecclesiasticorum Beneficiorum dicti ordinis per alios quam per ejusdem ordinis Monachos occupationem successerant domus et Ecclesie Monasteriorum et locorum ejusdem ordinis ad ruinam pervenerant et quedam ex eis solo equata et prostrata fore miserabiliter cernebantur suorum in dicto diffinitionis officio predecessorum vestigia sequendo pro utilitate manutentione et relevatione Monasteriorum et locorum ac ordinis predictorum plures diffinitiones ordinationes et nonnulla statuta ediderunt que honesta et rationabilia sunt ac prosperum et felicem statum Monasterii Cluniacensis ac ordinis predictorum concernunt Quare pro parte Prioris et Conventus predictorum nobis fuit humiliter supplicatum ut diffinitiones ordinationes et statuta predicta pro eorum subsistentia firmiori Apostolico munimine roborare ac alias super diffinitionum statutorum et ordinationum hujusmodi observatione opportune providere benignitate Apostolica dignaremur Nos igitur qui ordinis predicti prosperum regimen et felicem statum ac gubernationem intensis affectibus desideramus et de premissis certam notitiam non habemus hujusmodi postulationibus inclinati discretioni vestre per Apostolica scripta mandamus quatinus vos vel alter vestrum constito vobis legitime de premissis et quod diffinitiones ordinationes et statuta predicta rationabilia sint et contra constitutiones Apostolicas non existant et ad id dilecti filii Abbatis dicti Monasterii accedat assensus authoritate nostra approbare et confirmare curetis suppleatisque omnes et singulos defectus si qui forsan intervenerint in eisdem ac faciatis illa inviolabiliter observare contradictores per censuram Ecclesiasticam appellatione postposita compescendo Non obstantibus constitutionibus et ordinationibus Apostolicis ac Monasterii et ordinis predictorum juramento confirmatione Apostolica vel quavis alia firmitate roboratis statutis et consuetudinibus contrariis quibuscumque aut si aliquibus communiter vel divisim a sede Apostolica indultum existat quod interdici suspendi vel excommunicari non possint per litteras Apostolicas non facientes plenam et expressam de verbo ad verbum de indulto hujusmodi mentionem Datum Rome apud sanctum Petrum anno Incarnationis Dominice millesimo quadringentesimo septuagesimo quinto idus Aprilis Pontificatus nostri anno sexto