Charter Document - 02110068
| Charter Number: | 02110068 |
|---|---|
| Cartulary Title: | Bullarium Sacri Ordinis Cluniacensis [Cluny] |
| Charter Language: | Latin |
| Charter Origin: | Religious |
| Charter Type(s): | |
| Date: | 1467 |
| Date type: | Internal, A.D., Calendar, Papal |
| Resource Link(s): |
|
Charter:
Paulus Episcopus servus servorum Dei dilectis filiis Abbati et Conventui Monasterii Cluniacensis Matisconensis dioecesis Salutem et Apostolicam benedictionem Cum a nobis petitur quod justum est et honestum tam vigor equitatis quam ordo exigit rationis ut id per sollicitudinem officii nostri ad debitum perducatur effectum Ea propter dilecti in Domino filii vestris justis postulationibus grato concurrentes assensu omnes libertates et immunitates a predecessoribus nostris Romanis Pontificibus sive per privilegia vel alia indulta vobis et Monasterio vestro concessas necnon libertates et exemptiones secularium exactionum a Regibus et Principibus aut aliis Christi fidelibus vobis et eidem Monasterio rationabiliter indultas specialiter autem decimas primitias census fructus reditus proventus agros terras vineas prata pascua sylvas nemora domos grangias piscarias molendina stagna lacus jura jurisdictiones aliaque mobilia et immobilia bona ad dictum Monasterium legitime spectantia sicuti ea omnia juste et pacifice possidetis vobis et per vos eidem Monasterio Apostolica auctoritate confirmamus et presentis scripti patrocinio communimus salva in predictis decimis moderatione Concilii generalis Nulli ergo omnino hominum liceat hanc paginam nostre confirmationis et communitionis infringere vel ei ausu temerario contraire Si quis autem hoc attentare presumpserit indignationem omnipotentis Dei ac Beatorum Petri et Pauli Apostolorum ejus se noverit incursurum Datum Rome apud sanctum Marcum anno Incarnationis Dominice millesimo quadringentesimo sexagesimo septimo quarto decimo Kalendas Maii Pontificatus nostri anno tertio