Charter Document - 02110067

Pius Episcopus servus servorum Dei dilectis filiis Trenorchiensi ac insule Barbare Cabilonensis et Lugdunensis diocesum Monasteriorum Abbatibus Salutem et Apostolicam benedictionem Decet nostre provisionis auxilio prevenire ut loca Religiosa divino cultui dicata que in lapsum detestabilem ac ruinam periculosam venisse percepimus ut a desolationis incommodo relevari et votive reformationis effectum valeant adipisci ac ea que propterea processisse dicuntur ne in contemptionis scrupulum labantur sed firma et illibata persistant Apostolico munimine roborare Sane pro parte dilectorum filiorum Jacobi de Mousiaco Prioris Majoris et Conventus Monasterii Cluniacensis ad Romanam Ecclesiam nullo medio pertinentis Ordinis Capitis Matisconensis diocesis nobis nuper exhibita petitio continebat quod nuper quindecim diffinitores Capituli generalis Ordinis predicti qui anno quolibet in eodem Capitulo eliguntur in eodem Capitulo ut moris est Apostolica auctoritate electi provide considerantes quod causantibus guerris que in regno Francie per multos annos pro dolor viguerunt ac etiam senili etate quondam Oddonis Abbatis dicti Monasterii ultimo deffuncti ordo vester multa detrimenta tam circa regularem observantiam quam subditorum obedientiam passus fuerat ejusque beneficia alienata necnon domus et Ecclesie ipsius ordinis ad ruinam pervenerant et quedam ex eis solo equata et prostrata miserabiliter subjacebant matura inter eos deliberatione prehabita vestigia patrum suorum insequendo pro utilitate manutentione reformatione et relevatione Monasterii et Ordinis predictorum plures diffinitiones ordinationes et statuta fecerunt que desiderant auctoritate Apostolica confirmari Quare pro parte eorundem Prioris majoris et Conventus Monasterii Cluniacensis nobis fuit humiliter supplicatum ut diffinitionibus ordinationibus et statutis predictis pro illorum subsistentia firmiori robur Apostolice confirmationis adjicere et illa observari mandare aliasque in premissis oportune providere paterna diligentia curaremus Nos igitur felicem statum regimen et gubernationem predicti ordinis supremis affectibus desiderantes ac diffinitionum ordinationum et statutorum predictorum tenores et formas ac si de verbo ad verbum insererentur presentibus pro expressis habentes hujusmodi supplicationibus inclinati discretioni vestre per Apostolica scripta mandamus quatenus vos vel alter vestrum diffinitiones ordinationes et statuta predicta illis prius per vos visis et exanimatis diligenter si illa honesta et rationabilia fore ac pro utilitate manutentione et reformatione Monasterii et ordinis predictorum processisse repereritis super quo vestram conscientiam oneramus tam generaliter quam particulariter authoritate nostra approbetis et confirmetis suppleatisque omnes deffectus si qui forsan intervenerint in iisdem facientes illa inviolabiliter observari contradictores quoslibet et rebelles per censuram Ecclesiasticam sublato cujusvis appellationis obstaculo eadem authoritate compescendo invocato ad hoc si opus fuerit auxilio brachii secularis Non obstantibus constitutionibus et ordinationibus Apostolicis ac statutis et consuetudinibus Monasterii et ordinis predictorum juramento confirmatione Apostolica vel quavis alia firmitate roboratis contrariis quibuscumque aut si aliquibus communiter vel divisim ab Apostolica sit sede indultum quod interdici suspendi vel excommunicari non possint per litteras Apostolicas non facientes plenam et expressam ac de verbo ad verbum de indulto hujusmodi mentionem et quibuslibet aliis privilegiis indulgentiis et litteris Apostolicis generalibus vel specialibus quorumcumque tenorum existant per que presentibus non expressa vel totaliter non inserta effectus earum impediri valeat quomodo libet vel differri et de quibus ac eorum totis tenoribus de verbo ad verbum habenda sit in nostris litteris mentio specialis Datum Mantue anno Incarnationis Dominice millesimo quadringentesimo nono quinto Kalendas Octobris Pontificatus nostri anno secundo