Charter Document - 02110066

Calixtus Episcopus servus servorum Dei dilectis filiis sancti Philiberti Trenorchiensis et sancti Rigaudi ac Firmitatis supra Gronam Cabilonensis et Matisconensis diocesum Monasteriorum Abbatibus Salutem et Apostolicam benedictionem Sedis Apostolice gratiosa benignitas piis quarumlibet sub regulari habitu Domino militantium personarum votis libenter annuit et illis que ab ea seu aliis pro hujusmodi personis earumque Monasteriis commodo et decore processisse comperit uberioris interdum Apostolici muniminis amminiculum adjicit ut eo firmius illibata persistant quo frequentiori suo fuerint presidio pro tempore stabilita Cum itaque sicut exhibita nobis nuper pro parte dilectorum filiorum Abbatis et Conventus Monasterii Cluniacensis Matisconensis diocesis petitio continebat diversa privilegia concessiones pensiones assignationes et indulta Monasterium predictum et Ordinem Cluniacensem ac personarum et Religiosorum locorum et membrorum sibi subditorum prosperum et felicem statum concernentia nec non plurimum justa et rationabilia tam per nonnullos felicis recordationis presertim Leonem nonum Gregorium septimum Calixtum secundum Alexandrum tertium Gregorium nonum Innocentium quartum Alexandrum quartum Nicolaum tertium Honorium quartum Nicolum quartum Bonifacium octavum Joannem vigesimum secundum Clementem sextum Clementem septimum Joannem vigesimum tertium Martinum quintum Eugenium quartum et alios Romanos Pontifices predecessores nostros quam etiam clare memorie Romanorum Imperatores et Francorum Reges ac alios Principes Ecclesiasticos et seculares proinde retroactis temporibus successive concessa et indulta fuisse reperiantur illorumque aliqua jam incipiant propter vetustatem consumi et aboleri ac ea omnia et singula propter viarum longitudinem et alia discrimina que portando illa ad Romanam curiam pro ipsorum inibi obtinenda confirmatione contingere possent ad dictam curiam deferri commode nequeant Pro parte Abbatis et Conventus predictorum nobis fuit humiliter supplicatum ut privilegia concessiones pensiones assignationes et indulta predicta approbare et confirmare ac alias super iis opportune providere de benignitate Apostolica dignaremur Nos igitur de premissis certam notitiam non habentes hujusmodi supplicationibus inclinati discretioni vestre per Apostolica scripta mandamus quatenus vos vel duo aut unus vestrum Apostolicis seu aliis litteris privilegiorum concessionum pensionum assignationum et indultorum hujusmodi diligenter inspectis et habito super illarum continentia consilio cum expertis si illas bullatas seu sigillatas sanas et integras non vitiatas non cancellatas nec in aliqua sui parte suspectas sed omni prorsus vitio et suspicione carentes ac in eis contenta justa et rationabilia fore repereritis seu alter vestrum repererit super quo vestram conscientiam oneramus omnia et singula privilegia concessiones pensiones assignationes et indulta predicta authoritate nostra cum illorum de verbo ad verbum insertione approbetis ac perpetue firmitatis robore subsistere decernatis suppleatisque omnes et singulos defectus si qui forsan intervenerint in eisdem et nihilominus si approbationem confirmationem et suppletionem hujusmodi feceritis ipsa privilegia concessiones pensiones assignationes et indulta que nos etiam ex nunc prout ex tunc et ex tunc prout ex nunc valida et rata fore declaramus et decernimus per illosque ad quos spectat et pertinet ac spectare et pertinere contigerit faciatis eadem authoritate nostra per censuram Ecclesiasticam et alia juris remedia inviolabiliter observari aliaque faciatis disponatis et exequamini que in premissis necessaria fore noveritis seu quomodolibet opportuna Super quibus omnibus singulis vobis et vestrum cuilibet in solidum plenariam authoritate Apostolica tenore presentium concedimus facultatem Non obstantibus constitutionibus et ordinationibus Apostolicis nec non omnibus et singulis que dicti predecessores in eorum litteris non obstare voluerunt ceterisque contrariis quibuscumque aut si aliquibus communiter vel divisim ab eadem sit sede indultum quod interdici suspendi vel excommunicari non possint per litteras Apostolicas non facientes plenam et expressam ac de verbo ad verbum de indulto hujusmodi mentionem Ceterum quia difficile foret presentes litteras ad singula in quibus eis fides forsan facienda fuerit loca deferre dicta Apostolica authoritate decernimus quod illarum transsumpto manu publica et sigillo alicujus Episcopi aut illius Vicarii seu curie vel superioris Ecclesiastici signato et munito fides plenaria in judicio et extra adhibeatur et illi stetur sicut dictis originalibus litteris staretur si forent exhibite vel ostense Datum Rome apud sanctum Petrum anno Incarnationis Dominice millesimo quadringentesimo quinquagesimo quinto quinto Idus Decembris Pontificatus nostri anno primo