Charter Document - 02110065

Eugenius Episcopus servus servorum Dei ad futuram rei memoriam Ex injuncto nobis desuper licet immeritis Apostolice servitutis officio circa statum virorum et locorum Ecclesiasticorum maxime sub Regulari observantia Deo dicatorum curis assiduis intendentes ne in illis effrenato causante appetitu et obedientie bono rejecto nervus Ecclesiastice discipline dirimatur sed ut insolentiis transgressorum repressis status ipse dante Domino reformetur in melius nunc exquisitam materiam vagandi removendo nunc vero laxas habenas perstringendo partes nostre sollicitudinis impertimur Sane pro parte dilecti filii Oddonis Abbatis Monasterii Cluniacensis Matisconensis dioecesis nobis nuper exhibita petitio continebat quod nonnulli Priores et Monachi dicti Monasterii obtinentes Prioratus et alia beneficia ab eo dependentia ratione quorum Abbati pro tempore et dilectis filiis Conventui dicti Monasterii diversas pensiones tenentur persolvere ut illarum solutionem differre reliqui vero ut ad lascivias hujus seculi nec non excessus et crimina liberius vacare et correctiones propter hoc secundum statuta dicti Ordinis institutas evitare seque ab obedientia et subjectione dicti Abbatis possint subtrahere se temporibus retroactis sedis Apostolice Capellanos fieri ac nonnullorum ex venerabilibus Fratribus nostris sancte Romane Ecclesie Cardinalibus familiares seu Capellanos retineri procurarunt et exinde ab eodem Abbate se fore exemptos asserentes per lascivias hujusmodi discurrere et dictas pensiones ex quibus Abbas nonnulla onera sibi incumbentia supportare et Conventus hujusmodi partim sustentari consueverunt retinere seu illarum solutionem nimium differre non verentur pretendentes se pretextu litterarum Capellanatus et familiaritatum earumdem ab eodem Abbate de quibusvis criminibus seu excessibus per eos commissis seu perpetratis pro tempore puniri non debere in grave prejudicium Abbatis et Monasterii nec non scandalum Monasterii et Ordinis ac periculum animarum Priorum et Monachorum predictorum Quare pro parte dicti Oddonis Abbatis nobis fuit humiliter supplicatum ut sibi nec non eisdem Monasterio et Conventui in premissis opportune providere de benignitate Apostolica dignaremur Nos igitur considerantes singulorum privilegia taliter concedi debuisse ut per ea bonum obedientie precipue regularis non tollatur ac volentes intensis desideriis ut tenemur circa statum Regularium ut ab eis auferatur vagandi materia providere hujusmodi supplicationibus inclinati omnes et singulas litteras Capellanatus dicte sedis nec non familiaritatum hujusmodi et earum pretextu exemptionis sub quibusvis verborum formis eisdem Prioribus et Monachis dicti Ordinis etiamsi Prioratus Conventuales et Priores et Monachi supradicti cujuscumque alterius status gradus aut conditionis fuerint concessas in ea parte precipue qua exemptionem a dicto Abbate pro tempore vellent pretendere aut se ad non solutionem pensionum predictarum eisdem Abbati et Conventui faciendam non teneri authoritate Apostolica tenore presentium revocamus cassamus ac etiam annullamus Et nihilominus eidem Oddoni et ejus successoribus dicti Monasterii Abbatibus ut omnes et singulos Priores et Monachos dicti Ordinis pro tempore delinquentes hujusmodi litteras Capellanatus familiaritatum seu exemptionis a nobis forsan et a quibusvis Romanis Pontificibus predecessoribus et successoribus nostris seu Cardinalibus eisdem sub quibusvis verborum formis habentes et habituros a quibuscumque excessibus criminibus et delictis per eos pro tempore perpetratis juxta eorumdem criminum necnon excessuum et delictorum qualitatem ac statuta et consuetudines Monasterii et Ordinis predictorum corrigere et punire et in eos omnimodam jurisdictionem exercere nec non pensiones sibi et dictis Conventui ab eisdem Prioribus et Monachis pro tempore debitas exigere petere et habere et ad illas persolvendas perstringere et compellere possint et debeant in omnibus et per omnia perinde ac si Priores et alii Monachi supradicti litteras Capellanatus seu familiaritatum hujusmodi minime obtinerent vel sibi super illis dicte littere nullatenus concesse forent eadem authoritate indulgemus Non obstantibus si eisdem Prioribus et Monachis vel quibusvis aliis communiter vel divisim per easdem litteras seu alias ab eadem sit sede indultum quod per eosdem Oddonem Abbatem et successores de criminibus seu excessibus et delictis hujusmodi corrigi vel puniri seu ad solutionem dictarum pensionum eisdem Abbati pro tempore et Conventui faciendam perstringi et compelli non possint per litteras Apostolicas non facientes plenam et expressam ac de verbo ad verbum de indulto hujusmodi mentionem et quibuslibet aliis privilegiis et Indulgentiis Apostolicis ac aliis generalibus vel specialibus quorumcumque tenorum existant per que presentibus non expressa vel totaliter non inserta effectus earum impediri valeat quomodolibet vel differri et de quibus quorumque totis tenoribus habenda sit in nostris litteris mentio specialis Nulli ergo omnino hominum liceat hanc paginam nostre revocationis cassationis annullationis et concessionis infringere vel ei ausu temerario contraire Si quis autem hoc attentare presumpserit indignationem omnipotentis Dei et Beatorum Petri et Pauli Apostolorum ejus se noverit incursurum Datum Rome apud sanctum Petrum anno Incarnationis Dominice millesimo quadringentesimo trigesimo primo Idibus Decembris Pontificatus nostri anno primo