Charter Document - 02110063

Pius Episcopus servus servorum Dei universis Christi fidelibus presentes litteras inspecturis salutem et Apostolicam benedictionem Pastoris eterni qui non vult mortem peccatoris sed conversionem vices licet immeriti gerentes in terris gregem Dominicam cure nostre commissam ad vitam lucis eterne quantum cum Deo possumus perducere studemus et juxta creditum nobis Apostolice solicitudinis officium fideles singulos ad pia opera exercenda spiritualibus muneribus Indulgentiis videlicet et peccatorum remissionibus libenter invitamus ut per eorumdem operum exercitium suorum abolita macula delictorum ad eterne beatitudinis gloriam feliciter pervenire mereantur Cupientes igitur ut Ecclesia Monasterii Cluniacensis Matisconensis Dioecesis ad quam ut accepimus dilectus filius Joannes Cotignon Monachus Cluniacensis Ordinis qui in Theologia magister et totius Ordinis Cluniacensis Procurator generalis existit singularem gerit devotionis affectum congruis frequentetur honoribus et a Christi fidelibus in majori veneratione habeatur de omnipotentis Dei misericordia ac Beatorum Petri et Pauli Apostolorum ejus authoritate confisi omnibus et singulis utriusque sexus Christi fidelibus vere penitentibus et confessis seu statutis a jure temporibus firmum confitendi propositum habentibus qui septem Altaria in dicta Ecclesia consistentia singulis sextis diebus feriatis quadragesime a primis Vesperis usque ad Occasum Solis singularum earumdem dierum devote visitaverint et pro nostro ac Sedis Apostolice necnon pro tempore existentis Francorum Regis prospero statu ac Christiane Religionis augmento pias ad Deum preces humiliter effuderint quoties id fecerint easdem Indulgentias et peccatorum remissiones consequantur quas consequerentur si singulis eisdem diebus singulas alme urbis nostre et extra eam Ecclesias stationum personaliter visitarent auctoritate Apostolica tenore presentium misericorditer in Domino concedimus et elargimur presentibus quas sub quibusvis similium vel dissimilium Indulgentiarum revocationibus limitationibus suspensionibus aut aliis contrariis dispositionibus etiam in favorem Basilice principis Apostolorum de dicta urbe aut Fidei orthodoxe vel alias quomodo libet concessis et concedendis seu Cancellarie Apostolice regulis editis et edendis nullatenus comprehendi posse sed semper ab illis exceptas et quoties ille emanabunt toties in pristinum statum restitutas et de novo concessas esse ipsisque Christi fidelibus suffragari debere decernimus perpetuis futuris temporibus duraturis volumus autem quod si dictis Christi fidelibus visitantibus dictam Ecclesiam aliqua alia Indulgentia per nos concessa fuerit dicte presentes littere nullius sint momenti Datum Rome apud sanctum Petrum anno Incarnationis Dominice millesimo quingentesimo sexagesimo tertio quinto decimo Calendas Novembris Pontificatus nostri anno quarto