Charter Document - 02110061

Paulus Episcopus servus servorum Dei dilecto filio Carolo Tituli sancti Apollinaris presbytero Cardinali de Lotaringia nuncupato Salutem et Apostolicam benedictionem Ad personam tuam meritis pollentem ac virtutibus insignitam quam etiam multiplicum gratiarum muneribus decoravit Altissimus paterne considerationis dirigentes intuitum et attente prospicientes quod tu Romanam Ecclesiam cujus honorabile membrum existis tuorum honoras plenius magnitudine meritorum dignum quin potius debitum reputamus ut eamdem personam tuam specialibus favoribus et prerogativis prosequamur Cum itaque sicut Nobis nuper exposuisti licet Monasterio Clun Matisconensis Dioecesis quod Caput ipsius Clun Ordinis existit et quod ex dispensatione Apostolica in Commendam tenes inter alia obtinuerit quam plurima privilegia per felicis Recordationis Alexandrum IV Honorium etiam IV Gregorium X Innocentium VIII et alios diversos Romanos Pontifices predecessores nostros et Sedem Apostolicam concessa que alias sepius confirmata fuerunt in quibus inter alia cavetur ut Beneficia Officia et Grangie dicti Ordinis conferri aut pensionem super illorum fructibus reditibus et proventibus assignari etiam per dictam Sedem vel ejus Legatos de latere non possint absque expresso Abbatis Cluniacensis pro tempore existentis consensu et nisi in litteris collationis et pensionis assignationis hujusmodi expressa ac de verbo ad verbum mentio de dictis privilegiis facta fuerit nec Beneficia eadem absque expresso ipsius Abbatis consensu commendari valeant quodque in Beneficiis ejusdem Ordinis pro tempore commendatis idem Abbas unum ipsius Ordinis Religiosum constituere possit qui ibidem regularia Ordinis instituta observari faciat statumque ipsius Commendati Beneficii Abbati et Diffintoribus in Capitulis generalibus ejusdem Ordinis referat cui Religioso per Abbatem sic deputato Commendatarius congruam de Beneficii Commendati fructibus portionem qua sustentari commode expensasque eundo ad Capitulum generale et redeundo supportare valeat assignet alias Abbas ipse portionem de fructibus hujusmodi eidem Religioso propria auctoritate assignare possit prout in diversis litteris Apostolicis desuper confectis plenius continetur Nihilominus illa partim ob predecessorum tuorum Diffinitorumque predictorum incuriam partim ob crebras dicte Sedis provisionem Commendas et alias dispositiones de Prioratibus et aliis Beneficiis Ordinis hujusmodi etiam cum expressa privilegiorum hujusmodi derogatione hactenus indistincte factas maxima pars Beneficiorum eorumdem in perpetuas Commendas devenerunt nec Commendatarii Religiosum illum in suis Prioratibus alere aliaque quibus obnoxii sunt onera supportare curant in animarum suarum periculum Religionis opprobrium necnon charissimi in Christo filii nostri Henrici Francorum Regis Christianissimi cujus predecessores dictum Monasterium fundaverunt displicentiam illiusque bonorum omnium dissipationem et scandalum plurimorum et sicut eadem expositio subjungebat si tibi quamdiu Monasterium ipsum obtinueris quod tu privilegiis ipsis uti ac de Beneficiis dicti Ordinis ad collationem Abbatis dicti Monasterii pro tempore existentis spectantibus disponere possis concederetur ex hoc profecto incommodis et scandalis ipsis facile mederetur tam Henricus Rex prefatus ad quem tamquam dicti Monasterii fundatorem ipsiusque Religionis zelatorem de premissis pertinere dignoscitur quam tu nobis supplicavisti ut tibi quamdiu dictum Monasterium ut prefertur obtinueris eisdem privilegiis uti necnon de Beneficiis predictis disponere possis ac alias in premissis opportune providere de benignitate Apostolica dignaremur Nos igitur volentes te premissorum intuitu favore prosequi gratie specialis hujusmodi supplicationibus inclinati tibi quamdiu Monasterium predictum obtinueris ut prefatis et quibusvis aliis privilegiis Monasterio et Ordini predicto per quoscumque predecessores nostros et Sedem predictam hactenus sub quibuscumque tenoribus et formis concessis approbatis et innovatis etiamsi abrogata vel antiquata existant in omnibus et per omnia ac si in usu et viridi observantia existerent uti frui potiri ac eorum effectum consequi necnon de Beneficiis Ordinis hujusmodi ad collationem provisionem et quamcumque aliam dispositionem pro tempore existentis Abbatis dicti Monasterii spectantibus dumtaxat alias juxta formam regule Cancellarie Apostolice super moderatione indultorum ejusdem Romane sancte Ecclesie Cardinalium per nos edite disponere possis nec alie dispositiones de eisdem Beneficiis nisi per resignationem vel Commende cessionem in manibus Romani Pontificis pro tempore existentis factam vacent etiam per Nos et Sedem Apostolicam pro tempore facte valeant alias juxta tenorem ipsius regule et solitam indultorum Cardinalium hujusmodi formam auctoritate Apostolica indulgemus Non obstantibus quibuscumque decretis et ordinationibus Apostolicis ac Monasterii et Ordinis predictorum juramento confirmatione Apostolica vel quavis firmitate alia roboratis statutis et consuetudinibus ceremoniisque contrariis quibuscumque Nulli ergo omnino hominum liceat hanc paginam nostri indulti infringere vel ei ausu temerario contraire Si quis autem hoc attentare presumpserit indignationem omnipotentis Dei ac Beatorum Petri et Pauli Apostolorum ejus se noverit incursurum Datum Rome apud sanctum Petrum anno incarnationis Dominice millesimo quadringentesimo quinquagesimo quinto pridie Idus Januarii Pontificatus nostri anno primo Habentur littere patentes Regis Henrici II pro homologatione presentis Bulle date die x Martii MDLV