Charter Document - 02110060

Leo Episcopus servus servorum Dei ad perpetuam rei memoriam Apostolice nobis [meritis licet imparibus] desuper injuncta servitutis officium nos admonet et inducit ut circa ea que pro felici statu et salubri directione Monasteriorum et aliorum locorum quorumlibet et personarum in illis sub religionis jugo Domino famulantium etiam ad Divini cultus perseverantiam opportuna fore conspicimus operosis studiis jugiter intendamus ac his que propterea processisse dicuntur ut illibata persistant libenter cum a nobis petitur Apostolici muniminis presidium propensius impartiamur Sane pro parte dilectorum filiorum Prioris et Conventus Prioratus Sancti Martini de Campis Parisiensis Cluniacensis Ordinis nobis nuper exhibita petitio continebat quod nuper dictus Prioratus qui a Monasterio Cluniacensi Matisconensis Dioecesis ad Romanam Ecclesiam nullo medio pertinente dependet et cujus persone a primeva Observantia et antiquo vivendi modo exciderant per venerabilem Fratrem nostrum Jacobum Episcopum Claromontensem tunc dicti Monasterii Abbatem reformatus fuisset prefatus Jacobus Episcopus tunc Abbas pro hujusmodi Reformatione et Regularis Observantie in dicto Prioratu observatione nonnulla Statuta et Ordinationes juxta Regulam Sancti Benedicti et Regulatia instituta dicti Cluniacensis Ordinis ac prefati Prioratus fundationem et antiquam illius Observantiam de consensu ipsorum Prioris et Conventus fecit et edidit Et deinde Capitulum generale et successive tunc definitores ejusdem Ordinis Statuta et Ordinationes predictas approbarunt et confirmarunt prout in eisdem statutis et consuetudinibus ac super confirmatione et approbatione predictis Capituli et definitorum predictorum respective confectis litteris que diligenter examinari et illorum tenores de verbo ad verbum signis et characteribus obmissis presentibus inseri fecimus plenius continetur Quare pro parte Prioris et Conventus predictorum asserentium retroactis temporibus in prefato Prioratu et illius membris in Missarum et Divinorum Officiorum celebratione tot additiones et mutationes ultra et preter ac contra antiqua dicti Ordinis instituta ac Prioratus et predictorum membrorum fundationem successive factas fuisse Quod Officium longe a primeva ejus ratione alteratum et immutatum ac difficile et quasi impossibile existit tam prolixum Officium tractim et devote ut decet cantare et exolvere ac cum hoc Regularis discipline observantiam institutionem ceremonias et onera adimpiere Nobis fuit humiliter supplicatum ut statutis et ordinationibus predictis pro illorum subsistentia firmiori robur Apostolice confirmationis adducere ac alias pro felici et salubri statu dicti Prioratus in premissis opportune providere de benignitare Apostolica dignaremur Nos igitur qui Monasteriorum Regularium locorum omnium ac in illis Domino famulantium personarum salubrem statum et Regularis observantie conservationem et augmentum sinceris desideramus affectibus Priorem et Conventum predictos ac eorum singulos a quibusvis excommunicationis suspensionis et interdicti aliisque sententiis ecclesiasticis censuris et ponis a jure vel ab homine quavis occasione vel causa latis si quibus quomodolibet innodati existunt ad effectum presentium dumtaxat consequendum harum serie absolventes et absolutos fore censentes hujusmodi supplicationibus inclinati statuta et ordinationes predictas Apostolica authoritate tenore presentium approbamus et confirmamus ac perpetue firmitatis robur obtinere et firmiter observari debere decernimus supplentes omnes et singulos defectus si qui forsan intervenerint in iisdem Et insuper ne ex religiosorum et reformatorum translatione vel non reformatorum introductione seu commixtione vel penuria hujusmodi reformationem labefieri et deficere contingat authoritate et tenore predictis Statuimus et ordinamus quod Religiosi dicti Prioratus sic reformati sub hujusmodi reformatione bene viventes inde amoveri et extrahi seu de loco ad locum transferri vel non reformari inibi poni et introduci etiam per Abbatem dicti Monasterii Cluniacensis pro tempore existentem qui [sicut accepimus] dicti Prioratus Ordinarius collator et Superior existit aut per quamcumque personam quavis authoritate fulgentem sine consensu Prioris et Conventus predictorum nullatenus possit nisi per Priorem prefatum et pro reformatione membrorum Prioratus hujusmodi ac observatione dumtaxat observantie Regularis Quo casu Prior dicti Prioratus pro tempore existens dictos Religiosos de loco ad locum transferre et translatorum loco alios ponere et subrogare ad nutumque suum revocare ac in Prioratu membris predictis quoscumque Clericos ad professionem expressam secundum Regularia instituta dicti Ordinis admittere et recipere nulla super hoc ab ipso Abbate Cluniacensi petita licentia nec non quoties opportunum fuerit quecumque ornamenta Ecclesiastica benedicere possit et valeat Quocirca dilectis filiis Parisiensi Meldensi ac Sylvanectensi Officialibus per Apostolica scripta mandamus quatenus ipsi vel duo aut unus eorum per se vel per alium seu alios presentes litteras et in eis contenta quecumque ubi et quando opus fuerit ac quoties pro parte Prioris et Conventus predictorum fuerint super hoc requisiti solemniter publicantes ac in eis premissis efficacis defensionis presidio assistentes faciant authoritate nostra statuta et ordinationes predictas juxta illorum tenorem firmiter observari non permittentes Priorem pro tempore existentem et Conventum prefatos contra eorumdem statutorum aut ordinationum tenorem per dictum Abbatem pro tempore existentem seu quoscumque alios quomodolibet indebite molestari nec resecatis resecandis et mutatis mutandis Officium diurnum et nocturnum ac Missarum et aliorum Divinorum Officiorum hujusmodi secundum primevam dicti Ordinis institutionem et Prioratus et predictorum membrorum fundationem ordinent et redigant et in pristinum ac eum in quo additiones et commutationes hujus erat aut alium convenientem Regularem statum et ritum juxta Regularia instituta prefati Ordinis reponant non obstantibus ordinationibus Apostolicis ac Monasterii Prioratus et Ordinis predictorum juramento Confirmatione Apostolica vel quavis firmitate alia roboratis statutis et consuetudinibus nec non quibusvis privilegiis et indultis Monasterio et illius Abbati pro tempore existenti ac Prioratui et Ordini predictis sub quibuscumque tenoribus et formis concessis quomodolibet forsan contrariis quibus tenores illorum ac si de verbo ad verbum inserti forent presentibus pro expressis derogamus contrariis quibuscumque aut si prefato Abbati vel quibusvis aliis communiter vel divisim ab Apostolica sit Sede indultum quod interdici suspendi vel excommunicari non possint per litteras Apostolicas non facientes plenam et expressam ac de verbo ad verbum de indulto hujusmodi mentionem Nulli ergo omnino hominum liceat hanc paginam nostre absolutionis approbationis et confirmationis decreti suppletionis statuti ordinationis mandati et derogationis infringere vel ei ausu temerario contraire si quis autem hoc attentare presumpserit indignationem omnipotentis Dei ac Beatorum Petri et Pauli Apostolorum ejus se noverit incursurum Datum Rome apud Sanctum Petrum anno incarnationis dominice millesimo quingentesimo decimo sexto decimo sexto Calendas Octobris Pontificatus nostri anno quarto