Charter Document - 02110052

Callistus Episcopus servus servorum Dei ad futuram Rei memoriam Inter curas multiplices quibus occurrentium rerum negotiorumque varietatibus obsidemur illam libenter amplectimur per quam regularis ordinis loca prout congruere conspicimus in spiritualibus et temporalibus prosperitatis optate dirigantur eventu Unde efficacis ad id sollicitudinis studium adiicere cupimus ne religiose persone Ordinis et loca ipsa Apostolice providentie quod absit destituta consilio periculose deformationis attingant opprobrium sed labente cursu temporis eis acquisito statu prospero continuum dante domino suscipiant incrementum ea qua propterea processerunt ut firma perpetuo et illibata persistant libenter Apostolico munimine roborando Dudum siquidem felicis recordationis Nicolaus Papa IV predecessor noster cupiens indemnitati et integritati Monasterii et Ordinis Cluniacensis providere per suas litteras statuit et ordinavit Ut Capitulum generale Ordinis Cluniacensis singulis annis in dicto Monasterio Cluniacensi pro excessuum correctione et deformatorum reformatione celebraretur in quo Abbates et Priores dicti Ordinis Professores tenerentur interesse in ipsoque Capitulo generali quindecim ex Abbatibus et Prioribus prefati Ordinis auctoritate Apostolica presiderent qui eadem auctoritate possent statuta et diffinitiones facere ac alias pro reformatione prefati Ordinis mulctas et ponas imponere aliasque facere prout in eisdem litteris quarum tenores presentibus pro expressis haberi volumus plenius continetur Cum autem sicut ad nostrum pervenit auditum licet idem Nicolaus in prefatis litteris in non venientes ad idem Capitulum et legitime se non excusantes excommunicationis sententiam protulerit Nihilominus sententia ipsa a pluribus modicum formidabatur Unde prefati Diffinitores ultra sententiam excommunicationis predictam voluerunt et statuerunt auctoritate Apostolica quod antequam venientes ad Capitulum hujusmodi cessante eorum legitima excusatione seu impedimento absolverentur illam pecunie summam quam eundo redeundo et stando expendissent si venissent Abbati Cluniacensi persolvere debeant per ipsum Abbatem in reformationem et utilitatem omnium fratrum Capituli generalis prout necesse fuerit convertendam et ultra per unum mensem suis sumptibus in claustro Cluniacensi in observantia regulari remanere Quare pro parte dictorum Abbatis et conventus asserentium et propter guerras et alia temporum incommoda que a triginta vel quadraginta annis circa in Regno Francie viguerunt plures de dictis Abbatibus et Prioribus ad Capitula generalia dicti Ordinis more solito prout tenebantur venire secure asserebant nequiverunt et propterea contra ipsos seu aliquem ipsorum non fuerit processum prefateque constitutiones sub tali quali dissimulatione huc usque transierunt in ipsius Monasterii Cluniacensis et aliorum locorum dicti Ordinis permaximum prejudicium et gravamen et Christiani populi scandalum et Ordinis Monastici hujusmodi non modicam desolationem Nobis fuit humiliter supplicatum ut statuta per dictum Nicolaum IV et Benedictum III ac Diffinitores predictos facta confirmare ac alias in premissis opportune providere de benignitate Apostolica dignaremur Nos igitur ad quos pertinet super iis adhibere vigilantie nostre curas hujusmodi supplicationibus inclinati statuta predicta per Nicolaum IV et Benedictum III predecessores nostros ac tunc Diffinitores predicti Ordinis Cluniacensis ut premittitur facta contra Monachos ipsius Ordinis non venientes ad Capitula generalia et se legitime non excusantes auctoritate Apostolica tenore presentium ex certa scientia confirmamus et approbamus ac presentis scripti patrocinio communimus Supplentes omnes defectus si qui intervenerint in eisdem mulctas vero et ponas predictas ad omnes et singulos alios Monachos Ordinis sancti Benedicti qui beneficia prefati Ordinis Cluniacensis ad presens obtinent et pro tempore obtinebunt etiam si Sedis Apostolice capellani honoris sint aut exempti vel Privilegiati quomodocumque dummodo in Romana Curia residentes non fuerint auctoritate scientia et tenore similibus ampliamus et extendimus talesque Monachos Commendatarios ad Capitula generalia hujusmodi venire decernimus Itaque Abbas Cluniacensis pro tempore et dicti Capituli generalis Diffinitores qui sunt et pro tempore erunt auctoritate Apostolica deputati in tales Monachos commendatarios qui sunt Ordinis sancti Benedicti procedere ipsosque et eorum quemlibet juxta statuta regularia dicti Ordinis Cluniacensis et sanctiones Canonicas punire et corrigere et hujusmodi Commendis si eorum damnabilis et inhonesta vita ac demerita exegerint privare necnon contra illos procedere in omnibus et per omnia possint et valeant perinde ac si veri ipsorum Prioratuum Priores et aliarum administrationum administratores et Ordinem ipsum expresse professi existerent Itaque Prior Major vel Claustralis Cluniacensis qui fuerit pro tempore prefatos Priores administratores et Commendatarios Monachos Ordinis sancti Benedicti non venientes ad Capitula predicta ut est dictum aut alias legitime se non excusantes dissoluto ipso generali Capitulo per sequestrationem fructuum suorum Beneficiorum et censuram Ecclesiasticam ad solvendum ipsi Abbati summam pecunie predictam et ad standum per mensem in eodem Claustro Cluniacensi auctoritate Apostolica efficaciter compellere possint et valeant eadem auctoritate concedimus et simili scientia indulgemus Apostolicis et Synodalibus constitutionibus Monasteriorum et Ordinum quorumcumque consuetudinibus et statutis juramento confirmatione Apostolica seu quacumque alia roboratis indultis et privilegiis quibuscumque locis Ordinibus et personis sub quacumque verborum forma concessis aut forsan imposterum concedendis etiamsi de illis specialis et expressa ac de verbo ad verbum in nostris litteris mentio facienda quorum tenores ac si presentibus de verbo ad verbum insererentur haberi volumus pro sufficienter expressis ceterisque contrariis quibuscumque aut si Monachis quibusvis aliis communiter vel divisim ab Apostolica sit Sede indultum quod interdici suspendi vel excommunicari aut pecuniaria vel alia quavis pona mulctari non possint per litteras Apostolicas non facientes plenam et expressam ac de verbo ad verbum de indulto hujusmodi mentionem et quibuslibet aliis privilegiis indulgentiis et litteris Apostolicis generalibus vel specialibus quorumcumque tenorum existant per que presentibus non expressa vel totaliter non inserta Abbatis et Diffinitorum predictorum jurisdictio valeat quomodolibet impediri et que quo ad premissa Monachis predictis vel quibusvis aliis nolumus aliquatenus suffragari Nulli ergo omnino hominum liceat hanc paginam nostre confirmationis approbationis communionis supplementi ampliationis extensionis constitutionis concessionis et voluntatis infringere vel ei ausu temerario contraire si quis autem hoc attentare presumserit indignationem omnipotentis Dei et Beatorum Petri et Pauli Apostolorum ejus se noverit incursurum Datum Rome apud S Petrum anno incarnationis dominiee millesimo quadringentesimo quinquagesimo quinto Idibus Martii Pontificatus nostri anno primo