Charter Document - 02110045

Clemens Episcopus servus servorum Dei ad perpetuam rei memoriam Pia devotorum desideria fidelium illa presertim que divini cultus et Religionis augmentum respicere dignoscantur libenter favore Apostolico prosequimur eisque benevolum impertimur assensum Exhibita siquidem nobis pro parte electorum filiorum Jacobi Abbatis et Conventus Monasterii Clun Matisconensis Dioecesis petitio continebat quod olim bone memorie Andronius tituli S Marcelli Presbyteri Cardinalis olim Abbas dicti Monasterii provide attendens quod in civitate Avenionensi non erat aliquod Monasterium Monachorum nigrorum et quod valde decens existeret quod ordo Clun haberet in eadem civitate aliquod Monasterium Monachorum ipsorum in quo duodecim continue inibi deservientes in divinis et alii duodecim in jure Canonico studentes Monachi dicti Ord existerent quedam hospitia et hortos magne Domui Abbatis dicti Monasterii pro tempore existentia in dicta civitate consistentis contigua de bonis a Deo sibi collatis acquisivit ut inibi Monasterium ipsum construeretur et etiam fundaretur ac de aliquibus prioratibus seu aliis beneficiis dicti ordinis eidem Monasterio uniendis pro necessitatibus Monachorum eorundem inibi ponendorum ac servitorum eis necessariorum et aliis oneribus supportandis dotaretur Quare pro parte Jacobi Abbatis et Conventus predictorum nobis extitit humiliter supplicatum ut dictam modum in Monasterium dicti ordinis in honorem et sub vocabulo S Martialis Episcopi et Confessoris erigere ac statuere et ordinare quod domus ipsa deinceps Monasterium prefati ordinis existeret in quo duodecim continue Domino deservientes et alii duodecim in jure Canonico studentes Monachi dicti ordinis deberent perpetuo residere et quod inibi Ecclesia cum campanili Campanis Cemeterio domibus et aliis necessariis officinis construeretur et etiam edificaretur Et ut premissa decentius fieri ac iidem Monachi commodius sustentari valeant eidem Abbati uniendi et incorporandi tot Prioratus seu alia Beneficia dicti ordinis eidem Monasterio quod eorum fructus redditus et proventus mille florenos auri valerent annuatim licentiam concedere de benignitate Apostolica dignaremur Nos igitur ipsorum Iacobi Abbatis et Conventus laudabile propositum in hac parte plurimum in Domino commendantes hujusmodi supplicationibus inclinati dictam domum in Monasterium in honorem et sub vocabulo dicti S Martialis authoritate Apostolica erigimus ac statuimus et etiam ordinamus quod ex nunc dicta domus Monasterium dicti ordinis existat et Monasterium S Martialis nuncupetur et a dicto Monasterio Cluniacensi dependeat et per Monachos ejusdem Monasterii Cluniacensis juxta ordinationem dicti Jacobi Abbatis cum consilio Fratris Petri Archiepiscopi Arelatensis Camerarii nostri super hoc faciendam perpetuo regatur et etiam gubernetur Et quod in eodem Monasterio sic de novo erecto duodecim inibi Domino continue deservientium et aliorum duodecim in jure Canonico studentium Monachorum numerus perpetuo esse debeat et existat Et quod Monasterium sic erectum ac hujusmodi et alii si qui forsan in majori numero pro tempore fuerint Monachi in ipso Monasterio commorantes gaudeant omnibus privilegiis libertatibus et immunitatibus quibus alia Monasteria et etiam Monachi dicti ordinis gaudent et gaudere consueverunt et quod Jacobus Abbas et Conventus predicti Ecclesiam hujusmodi cum Campanuli Campanis Cemeterio domibus et aliis officinis predictis in ipso Monasterio sic ut prefertur erecto in loco tamen ad hoc congruo et honesto construere et construi facere teneantur super quo eis specialem concedimus tenore presentium potestatem et insuper eisdem Abbati et Conventui Ecclesiam et cemeterium hujusmodi cum constructa fuerint per aliquem Catholicum antistitem gratiam et concessionem Sedis Apostolice habentem benedicendi ac etiam consecrandi et nihilominus eidem Jacobo Abbati statuendi et ordinandi auctoritate predicta cum consilio dicti Archiepiscopi eidem Monasterio sic ut premittitur erecto pro hujusmodi necessitatibus et aliis oneribus supportandis tot Prioratus seu alia beneficia Ecclesiastica dicti ordinis quod eorum fructus redditus et proventus valorem mille florenorum auri ponderis Florentini non excedant annuatim dummodo Prioratus seu beneficia hujusmodi Conventuales seu Conventualia non fuerint etiamsi dispositioni Apostolice specialiter vel generaliter reservati seu reservata existant cum omnibus juribus et pertinentiis suis Ita tamen quod cedentibus vel decedentibus Prioribus Prioratuum sic ut prefertur uniendorum ac beneficia predicta obtinentibus liceat illi qui eidem Monasterio sic ut prefertur erecto pro tempore prefuerit corporalem possessionem Prioratuum et Beneficiorum eorundem apprehendere ac nancisci ac perpetuo retinere Diocesanorum locorum et cujuslibet alterius licentia minime requisita ac fructus redditus et proventus Prioratuum et beneficiorum eorumdem perpetuo percipere et habere ac illos in usus suos et Monasterii predicti ac in supportationem onerum et in sustentationem Monachorum eorundem convertere et licite disponere de illis non obstantibus quibuscumque constitutionibus Apostolicis ac statutis et consuetudinibus Monasterii et ordinis predictorum contrariis juramento confirmatione Apostolica vel quacumque firmitate alia roboratis Seu si aliqui super premissionibus sibi faciendis de hujusmodi Prioratibus aut aliis beneficiis Ecclesiasticis in illis partibus speciales vel generales Apostolice Sedis vel Legatorum ejus litteras impetrarint etiamsi per eas ad inhibitionem reservationem et Decretorum vel alios quomodolibet sit processum quas quidem litteras et processus habitos per eosdem ad Prioratus ac beneficia ejusmodi volumus non extendi sed nullum per hoc eis quoad assecutionem prioratuum ac beneficiorum aliorum prejudicium generari et quibuslibet privilegiis indulgentiis et litteris Apostolicis generalibus vel specialibus quorumcumque tenorum existant per que presentibus non expressa vel totaliter non inserta effectus earum impediri valent quomodolibet vel differri et de quibus quorumque toties tenoribus habenda sit in nostris litteris mentio specialis proviso quod Prioratus ac beneficia hujusmodi debitis obsequiis non fraudentur ac solitis Monachorum et administrorum numerus in eisdem nullatenus minuatur ac deserviatur inibi laudabiliter in divinis plenam et liberam concedimus tenore presentium facultatem Nos enim ex nunc irritum decernimus et inane si secus super iis a quoquam quavis auctoritate scienter vel ignoranter contigerit attentari Nulli ergo omnino hominum liceat hanc paginam nostre erectionis statuti ordinationis concessionis voluntatis et constitutionis infringere vel ei ausu temerario contraire Si quis autem hoc attentare presumpserit indignationem omnipotentis Dei et Beatorum Petri et Pauli Apostolorum ejus se noverit incursurum datum apud Speluncam Cajetan Dioecesis undecimo Kalendas Maii Pontificatus nostri anno primo