Charter Document - 02110040

Ioannes Episcopus servus servorum Dei ad perpetuam Rei memoriam Pro singulorum fidelium presertim Religiosarum personarum statu salubriter dirigendo prout ex debito injuncti Pastoralis tenemur officii sollicite considerationis intuitum extendentes ad ea per que earum dispendiis occurritur libenter adhibemus sollicitudinis nostre partes Hinc est quod nos dilectorum filiorum Abbatis et conventus Monasterii Cluniacensis Matisconensis Dioecesis in hac parte supplicationibus inclinati auctoritate Apostolica tenore presentium statuimus et etiam ordinamus quod nulli sive Cluniacensis sive sancti Benedicti seu cujuslibet alterius Ordinis professores aut etiam quicumque alii cujuscumque status gradus aut conditionis existant vigore quarumcumque litterarum super collationibus et provisionibus de Beneficiis Ecclesiasticis cum cura vel sine cura per Monachos dicti Cluniacensis Ordinis gubernari consuetis etiamsi Prioratus aut Decanatus non tamen conventuales vel administrationes vel officia forent ad collationem provisionem presentationem electionem seu quamvis aliam dispositionem Cluniacensis predicti necnon aliorum ipsius Cluniacensis Ordinis Monasteriorum Abbatum et Priorum necnon Decanorum ac conventuum quorumlibet communiter vel divisim pertinentibus vacantibus vel vacaturis ipsis aut eorum alicui pro tempore faciendis sub quacumque verborum forma hactenus obtentarum seu in posterum obtinendarum ac processuum qui per illas habiti pro tempore censebuntur officia quecumque manualia seu Claustralia que in eisdem Monasteriis ac Prioratibus et Decanatibus pro tempore vacare contigerit antedictis acceptare seu de illis sibi per Executores dictarum litterarum a Sede predicta ipsis deputatos et etiam deputandos necnon subexecutores illorum facere valeant aliquatenus provideri Decernentes hujusmodi litteras atque processus ad Officia predicta non debere aliquatenus extendi ac irritos et inanes predictos ac alios quoscumque processus necnon excommunicationis suspensionis et interdicti sententias si quos contra hujusmodi nostrorum statuti ac Ordinationis tenorem per litteras easdem etiam adversus Abbates Priores ac Decanos prefatos haberi contigerit aut etiam promulgari non obstantibus dictis et quibuscumque aliis clausulis eis derogatoriis in ipsis litteris forsan contentis etiamsi de illis de verbo ad verbum presentibus mentio foret habenda aut aliis gratiis quibuscumque Nulli ergo [] Datum apud sanctum Antonium extra Muros Florentinenses XIII Kalendas Novembris Pontificatus nostri anno IV