Charter Document - 02110036

Ioannes Episcopus servus servorum Dei dilectis filiis Abbati et conventui Monasterii Cluniacensis ad Romanam Ecclesiam nullo medio pertinentis Matisconensis Dioecesis salutem et Apostolicam benedictionem Sacrosancta Romana Ecclesia mater cunctorum fidelium et Magistra in agro virtutum vestri Ordinis cui Altissimus benedixit et in decore sancte Religionis sub qua virtutum Domino devotum et gratum impenditis famulatum exultat et jubilat presertim dum prospicit quod vos ad alta virtutum gradibus per exercitium bonorum operum et preclara sanctitatis merita conscendentes trahitis ad Divine Majestatis obsequium alios per exemplum vitam ducendo purissimam Hospitalitatem servando et divine laudis frequentie celebrisque venerationis instantie ex qua gloria divine Majestatis attollitur devotissime insistendo propter quod Ordinem vestrum prefatum quem erga nos et eamdem Ecclesiam devotionis claritate prelucere conspicimus infra Claustra nostri pectoris paternis affectibus complectentes circa bonum statum ipsius totis studiis vigilamus ut Deo propitio protegatur a noxiis atque salubria semper incrementa suscipiat necnon pacis et tranquillitatis affluat ubertate ipseque et persone ipsius ab omni sint perturbatione secure ac a jugo cujuslibet oppressionis serventur illese prerogativa libertatis Apostolice communimus Sane petitio vestra nobis exhibita continebat quod licet vestrum Monasterium cum Abbatiis Prioratibus Decanatibus Ecclesiis et aliis membris suis eidem immediate vel mediate subjectis ubilibet constitutis ab olim reputatum fuerit et adhuc etiam reputetur communiter fore a jurisdictione quorumlibet judicum Ordinariorum exemptum ac soli immediate Sedi Apostolice subjacere cum personis degentibus in eisdem tamen nobis humiliter supplicastis ut ad vitandum cujuslibet molestie ac inquietationis materiam que vobis contra hujusmodi exemptionis libertatem posset inferri et ut cuilibet propterea tollatur contra vos occasio malignandi Monasterium vestrum cum Abbatiis Prioratibus Decanatibus membris et personis predictis pro incremento boni status Monasterii et membrorum ac pace et tranquillitate personarum degentium in eisdem de novo eximere totaliter auctoritate Apostolica dignaremur Nos igitur qui in Monasterio vestro plene novimus premissa et alia multa bona opera et sanctitatis clarere insignia cultumque divinum Regularem observantiam et Religionis normam inter alia Monasteria relucere illudque multipliciter reflorere in spiritualibus volentes paci et tranquillitati vestre perpetue ac membrorum et personarum eorumdem providere salubriter vosque ac Monasterium et alia membra vestra prerogativa specialis favoris et gratie insignire illaque decorare singularis privilegii titulo intendentes adinstar predecessorum nostrorum Summorum Pontificum felicis record Alexandri Urbani Innocentii et Gregorii hujusmodi supplicationibus inclinati prefatum vestrum Monasterium cum omnibus et singulis aliis Monasteriis Prioratibus Decanatibus Ecclesiisque Parochialibus locorum et aliis quibuscumque membris suis utriusque sexus ipsi vestro Monasterio immediate vel mediate subjectis habitis vel habendis cum omnibus personis regularibus vestrorum Ordinis et Religionis degentibus in eisdem presentibus et futuris ac familiaribus et servitoribus ab omni ordinaria jurisdictione dominio visitatione et potestate qualibet omnium et singulorum Patriarcharum Archiepiscoporum Episcoporum et aliorum quorumlibet judicum ordinariorum Ecclesiasticorum plene de specialis dono gratie de novo eximimus et totaliter liberamus illaque in jus et potestatem Beati Petri et Sedis ejusdem et sub eorum speciali et immediata protectione suscipientes et nostra Decernimus Monasterium vestrum ac omnia et singula Monasteria Prioratus Decanatus et alia membra et personas predictas soli et immediate Sedi Apostolice subjacere quodque locorum Ordinarii Diocesani vel alia quevis persona Ecclesiastica in vos Monasteria Prioratus Decanatus et alia membra et personas prefatas ut pote prorsus exempta non possint auctoritate ordinaria excommunicationis suspensionis et interdicti sententias promulgare vel alias etiam ratione delicti seu contractus vel rei dequa agetur ubicumque committatur delictum ineatur contractus aut res ipsa consistat potestatem seu jurisdictionem aliquam quomodolibet exercere felicis recordationis Innocentii Pape IV predecessoris nostri circa exemptos edita que incipit volentes Et omnibus aliis constitutionibus Apostolicis in contrarium editis non obstantibus quibuscumque Nos enim quaslibet excommunicationum suspensionum interdicti sententias et quoscumque processus quasvis ponas et sententias continentes quas et quos contra vos Monasteria Prioratus Decanatus et alia membra et personas predictas contra tenorem et formam exemptionis hujusmodi quomodolibet promulgari et haberi contigerit irritos decernimus et inanes Volumus autem quod vos in sigmum percepte ab eadem Romana Ecclesia libertatis et exemptionis hujusmodi unam unciam auri dicte Romane Ecclesie in festo Beatorum Apostolorum Petri et Pauli solvere perpetuo teneamini annuatim quodque per presentem exemptionem et alia supradicta libertatibus Privilegiis et immunitatibus aliis vestris et Ordinis vestri nullum prejudicium generetur quinimo volumus quod illa in sua plena remaneant firmitate Nulli ergo omnino hominum liceat hanc paginam nostrarum exemptionis liberationis susceptionis constitutionis et voluntatis infringere vel ei ausu temerario contraire Si quis autem hoc attentare presumpserit indignationem omnipotentis Dei et Beatorum Petri et Pauli Apostolorum ejus se noverit incursurum Datum Rome Kalendis Aprilis Pontificatus nostri anno III