Charter Document - 02110034

Urbanus Episcopus servus servorum Dei ad perpetuam Rei memoriam Sedes Apostolica Pia mater Ecclesiarum et locorum Ecclesiasticorum omnium ac personarum in eis degentium statui et saluti cupit quantum cum Deo potest salubriter providere Sane petitio pro parte dilectorum filiorum Joannis de Castro veteri Prioris et conventus Prioratus Aregrandis Ordinis sancti Benedicti Vapincensis Dioecesis nobis exhibita continebat quod Prior Prioratus sancti Sepulchri Jerosolymitani de Aquapendenti Ordinis sancti Augustini Vrbe veteranens Dioecesis qui predictum Prioratum Aregrandis cum Prioratibus ab eo dependentibus et aliis membris suis suo Prioratui sancti Sepulchri asserit esse subjectum hujusmodi subjectione a longissimo tempore non est usus quodque iidem Joannes Prior et conventus ac predictus Aregrandis et alii Prioratus ac membra ipsius Prioratus Aregrandis tam virorum quam mulierum ejusdem Ordinis necnon Ecclesie capelle domus atque loca eidem Prioratui Aregrandis immediate subjecta seu ab eo dependentia et persone in eis degentes superiorem Abbatem non habent qui ea visitet et reformet Quare pro parte dictorum Joannis Prioris et conventus nobis fuit humiliter supplicatum ut dictum Prioratum Aregrandis cum omnibus Prioratibus ei subjectis et membris predictis a predicta subjectione ipsorum Prioris et Prioratus sancti Sepulchri plenarie liberare ipsumque Prioratum Aregrandis cum predictis Prioratibus ei subjectis necnon membris Ecclesiis capellis Domibus et locis predictis dilecto filio Abbati Monasterii Cluniacensis Matisconensis Dioecesis subjicere de benignitate Apostolica dignaremur Nos igitur cupientes ut in locis Religiosis quibuslibet Regularis observantia continuum auctore Domino suscipiat incrementum hujusmodi supplicationibus inclinati prefatum Prioratum Aregrandis cum omnibus Prioratibus ab eo dependentibus et membris suis predictis a prefata subjectione dictorum Prioris et Prioratus sancti Sepulchri auctoritate Apostolica plenarie liberamus ac eumdem Prioratum Aregrandis cum predictis Prioratibus ei subjectis necnon membris tam virorum quam mulierum ac Ecclesiis capellis Domibus et locis predictis ac juribus et pertinentiis universis eorumdem Monasterio Cluniacensi et ejus Abbati predictis auctoritate Apostolica perpetuo subjicimus ac statuimus quod iidem Prior et conventus ac Prioratus Aregrandis cum Prioratibus et membris Domibus et locis supradictis que Regulares existunt et personis in eis degentibus quoad visitationem correctionem Reformationem et alia quelibet que jurisdictionis et potestatis existunt eidem Abbati immediate subjecta et ab omni alterius Dominio et subjectione ac onere sicuti sunt alii Prioratus et eorum Priores et Monachi a prefato Monasterio dependentes liberi existunt ita tamen quod quotiescumque in Prioratu Aregrandis supradicto ac aliis Prioratibus membris et locis predictis ab eo dependentibus Monachi vel alie persone deficient Religiose Prior dicti Prioratus Aregrandis pro tempore existens in locum Monachorum deficientium Monachos et alias personas recipere et ponere ac Beneficia sibi subjecta conferre possit prout est hactenus fieri consuetum non obstantibus quibuscumque constitutionibus Apostolicis ac statutis et consuetudinibus Monasterii Prioratus et Ordinis predictorum contrariis juramento confirmatione Apostolica vel quacumque firmitate alia roboratis et insuper eisdem Priori et conventui Prioratus Aregrandis eadem auctoritate concedimus ut ipsi ac Prioratus Aregrandis et alii Prioratus ab eo dependentes necnon loca et membra ejus predicta et persone Regulares in eis degentes omnibus Privilegiis indulgentiis Exemptionibus gratiis et immunitatibus gaudeat quibus gaudent Prioratus et Monachi Cluniacensis Ordinis antedicti Per hoc autem locorum Ordinariis quoad Ecclesias capellas et alia loca per seculares clericos regi consueta nullum volumus prejudicium generari Nulli ergo [] Datum Avenioni VIII Idus Decembris Pontificatus nostri anno IV