Charter Document - 02110033

Urbanus Episcopus servus servorum Dei dilectis filiis Abbati et conventui Cluniacensis Matisconensis Dioecesis salutem et Apostolicam benedictionem Sacrum vestrum Cluniacensem Ordinem tanquam divinitus institutum et superni roris benedictione perfusum cujus suavitatis odorem sub ipsius professionis observantia degustavimus hactenus inter ceteras orbis religiones mentis nostre oculis intuentes libenter opem et operam adhibemus per quam in solita sue religionis honestate permaneat et sublatis quibus libet indigentiis per nostre provisionis studium spiritualiter et temporaliter augeatur Cum itaque dudum felicis recordationis Joannes Papa vigesimus secundus predecessor noster tempore quo construi fecit papale Palatium in loco Pontissorgie Avenionensis Dioecesis pro subsidio et Majori commoditate constructionis hujusmodi Ecclesiam Beate Marie de Belvedere dicte Dioecesis tunc Prioratum a vestro Monasterio dependentem de quo idem Monasterium certam percipiebat annuam pensionem Ecclesie Romane immediate subjecerit fructus redditus et proventus ipsius camere Apostolice applicando Nos dignum et congruum arbitrantes ut in recompensationem aliquam premissorum Sedis Apostolice providentia se vobis exibeat liberalem ac etiam attendentes quod vos aliique Monachi dicti Ordinis quos pro diversis negotiis oportet sepius curiam Romanam adire in qua locum proprium non habetis ad diversa secularium personarum hospitia etiam publica declinatis in quibus trahitis moram ad tempus cum magnis sumptibus et expensis et quod gravius et periculosius est non sine debite honestatis et regularis observantie lesione Et propterea vobis et eidem Ordini super his providere volentes Palatium seu domum per quemdam Hugonem de Bancio comitem Avelini dudum nomine clare memorie Ludovici Regis et carissime in Christo filie nostre Joanne Regine Sicilie illustris dum idem Hugo Senescalis officium pro eisdem Rege et Regina in provincia Provincie exerceret fundatum atque constructum in Parochia sancti Desiderii Avenionensis situatum ad nos et eamdem Ecclesiam pertinens pleno jure et cum curti horto ac omnibus pertinentiis et coherentiis suis quorum confinia inferius describuntur ab omni proprietate ac dominio Romane Ecclesie et ab omni servitute ac alienatione cujuscumque librate venerabilium fratrum nostrorum ejusdem Ecclesie Cardinalium et quorumlibet aliorum sub infra scripto tamen servitio seu censu auctoritate Apostolica penitus eximentes prefatum Palatium cum curti horto pertinentiis et coherentiis antedictis vobis et eidem Ordini vestro eadem auctoritate ac de Apostolice potestatis plenitudine tenore presentium in perpetuum concedimus tradimus et donamus Ita quod ex nunc liceat vobis et successoribus vestris Abbatibus et conventui dicti Monasterii vestri prefatum Palatium ingredi illudque cum curti horto pertinentiis et coherentiis predictis habitare atque tenere et de illis pro usu et habitatione vestre ac eorumdem successorum vestrorum disponeret pro voluntatis libito ordinare Volumus autem quod in recognitionem superioris Dominii et donationis hujusmodi duodecim denarios monete currentis anno quolibet in festo videlicet nativitatis Domini pro censu seu servitio dicte Apostolice Camere persolvatis quodque de certis pecuniarum summis quas dilectus filius Vannellus Raynerii de Luca civis Avenionensis titulo venditionis territorii seu fundi super quo dictum Palatium pro aliqua sui parte constructum existit ac etiam quarumdam domorum eidem Palatio coherentium a nostra et dicte Sedis Camera se asserit debere recipere dicto Vanello de vestris pecuniis nomine dicte Camere satisfacere procuretis aut alias secum super his prout melius poteritis concordatis Confinia vero de quibus supra fit mentio ista sunt Et primo videlicet muri antiqui civitatis Avenionensis aqua Sorgie in medio Et secundo versus Orientem Hospitium et orti Majeti Macellarii nomine uxoris sue et Gaufridi Esquicha Macellarii A tertio orti dicti Gaufridi ac Raymundi Marmeti et Joannis Vergerii et Colini Redonis ac Henrici Sabbaterii et Petri Giraudi ac Jacobi Hucquerii Et quarto vero versus occidentem virgultum heredum quondam Joannis de Daira et Curtis ac ortus Jacobi de Rioms et Carreris seu via publica qua tenditur ad muros novos dicte civitatis et hospitium dicti Jacobi de Rioms et alia hospitia videlicet Michaelis de Montilio et de Mari Joannis de Vlmo Presbyteri ac Joannette Calamelle et hospitium quod fuit quondam Dulcie Pergamenerie Nulli ergo omnino hominum liceat hanc paginam nostre Exemptionis concessionis traditionis donationis et voluntatis infringere vel ei ausu temerario contraire Si quis autem hoc attentare presumpserit indignationem omnipotentis Dei et beatorum Petri et Pauli Apostolorum ejus se noverit incursurum Datum Avenione decimo sexto Kalendas Aprilis Pontificatus nostri anno primo