Charter Document - 02110031
| Charter Number: | 02110031 |
|---|---|
| Cartulary Title: | Bullarium Sacri Ordinis Cluniacensis [Cluny] |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1364 |
| Date type: | Internal, Calendar, Papal |
| Resource Link(s): |
|
Charter:
Urbanus Episcopus servus servorum Dei dilecto filio Simoni Abbati Monasterii Cluniacensis Matisconensis Dioecesis salutem et Apostolicam Benedictionem Cunctis Christi fidelibus incommodis et oneribus pregravatis paterna pietate compatimur eisque libenter prout possibilitas nobis conceditur de Apostolice relevationis remedio subvenimus Sed hoc erga illos libentius agimus qui Dei sunt obsequiis deputati ne propter defectum necessariorum iidem ab hujusmodi obsequiis retrahantur Sane cum tu ac nonnulli tui predecessores Abbates Monasterii Cluniacensis Matisconensis Dioecesis vinum de Cluniaco seu de Burgundia nobis et predecessoribus nostris Romanis Pontificibus ac fratribus nostris Sancte Romane Ecclesie Cardinalibus existentibus citra montes ex mera tua et ipsorum predecessorum tuorum liberalitate consueveritis mittere annuatim Nos attendentes quod vinum hujusmodi ad tam magnam quantitatem ascendit quod exinde dictum Monasterium nimium aggravatur quodque Monasterium ipsum propter Guerrarum Turbines et alias adversitates multiplices multum est in suis facultatibus diminutum et propterea ad ipsum affectum paterne compassionis habentes tibi tuisque successoribus tenore presentium districtius inhibemus ne de cetero nobis aut successoribus nostris Romanis Pontificibus vel eisdem Cardinalibus aut cuicumque alteri de Romana curia directe vel indirecte hujusmodi vinum de Cluniaco vel Burgundia transmittere presumatis alioquin te ac eosdem successores tuos si secus feceris seu fecerint excommunicationis sententiam incurrere volumus ipso facto Nulli ergo [] Datum Avenioni Idibus Martii Pontificatus nostri anno II