Charter Document - 02110030
| Charter Number: | 02110030 |
|---|---|
| Cartulary Title: | Bullarium Sacri Ordinis Cluniacensis [Cluny] |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1364 |
| Date type: | Internal, Calendar, Papal |
| Resource Link(s): |
|
Charter:
Urbanus Episcopus servus servorum Dei ad perpetuam rei memoriam Gerentes ad Monasterium Cluniacense ad nos et Romanam Ecclesiam nullo medio pertinens Matisconensis Dioecesis specialis dilectionis affectum intentis desideriis affectamus ut Officia in dicto Monasterio consistentia personis conferantur idoneis per quas officia ipsa in spiritualibus et temporalibus regi valeant utiliter et salubriter gubernari Exhibite siquidem nobis nuper pro parte dilectorum filiorum Simonis Abbatis et conventus Monasterii Cluniacensis predicti petitionis series continebat quod Prioratus Majoris Sacristie Decanatus Eleemosynarie et Archidiaconatus Officia in dicto Monasterio consistentia ratione honestatis administrationis et spiritualis ac temporalis jurisdictionis que ad Officia pertinere noscuntur requirunt honestatem reverentiam maturitatem et sufficientiam eis presidentium personarum Quare pro parte Abbatis et conventus predictorum nobis extitit humiliter supplicatum ut cum per ipsos ad quas ipsorum Officiorum collationes pertinere noscuntur et qui personarum dicti Monasterii ad hoc sufficientium et idonearum habent notitiam pleniorem possit de ipsis Officiis decentius et utilius ordinari providere super hoc de benignitate Apostolica dignaremur Nos igitur cupientes ut Officia ipsa personis committantur idoneis que sciant velint et valeant illa salubriter regere et feliciter gubernare hujusmodi inclinati supplicationibus auctoritate Apostolica statuimus et etiam ordinamus quod deinceps in ipsa Prioratus majoris Sacristie Decanatus Eleemosynarie et Archidiaconatus Officia seu eorum aliqua cum illa vacare contigerit per quoscumque Beneficia Ecclesiastica ac Dignitates Personatus et Officia per Monachos ipsius Monasterii gubernari consueta auctoritate litterarum Apostolicarum expectantes earumdem litterarum sub quacumque forma verborum eis concessarum vigore attentare valeant nec de ipsis Officiis possit eis quolibet modo provideri nisi in eisdem litteris de ipsis Prioratus Majoris Sacristie Decanatus Eleemosynarie ac Archidiaconatus Officiis plena specialis et expressa mentio habeatur Constitutionibus Apostolicis ac statutis et consuetudinibus Monasterii et Ordinis predictorum contrariis juramento confirmatione Apostolica vel quacumque alia firmitate roboratis non obstantibus quibuscumque Nulli ergo [] Datum Avenioni VII Kalendas Martii Pontificatus nostri anno II