Charter Document - 02110023
| Charter Number: | 02110023 |
|---|---|
| Cartulary Title: | Bullarium Sacri Ordinis Cluniacensis [Cluny] |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1346 |
| Date type: | Internal, Calendar, Papal |
| Resource Link(s): |
|
Charter:
Clemens Episcopus servus servorum Dei dilectis filiis sancti Germani Parisiens et Trenorchiensi ac S Andree Cabilonens et Avenionens Dioces Monasteriorum Abbatibus salutem et Apostolicam benedictionem Querelam dilectorum filiorum Iterii Abbatis et conventus Monasterii Cluniac Matisconens Diocesis nuper recepimus continentem quod licet felicis Recordationis Ioannes Papa XXII predecessor noster tam in Consistorio quam extra contra Priores Decanos et administratores alios Cluniacensis Ordinis census vicesimas redditus et pensiones ac obventiones Abbati dicti Monasterii qui est pro tempore et dictis Abbati et conventui debitas non solventes in terminis consuetis certas Ordinationes fecerit ponas diversas et sententias continentes ipsi tamen Priores Decani et administratores seu multi ex ipsis ponis et sententiis hujusmodi vilipensis predicta per eos debita solvere neglexerunt hactenus et recusaverunt ac negligunt etiam et recusant ac ponas et sententias hujusmodi sustinuerunt et adhuc sustinent animis induratis in animarum suarum periculum ac Abbatis et conventus predictorum prejudicium non modicum et gravamen Quare pro parte ipsorum Abbatis et conventus nobis extitit humiliter supplicatum ut providere eis super iis de opportuno remedio dignaremur Quocirca discretioni vestre per Apostolica scripta mandamus et committimus quatenus vos vel duo aut unus vestrum per vos vel alium seu alios Prioribus decanis et administratoribus predictis et aliis qui fuerint evocandi ad vestram presentiam etiam personaliter evocatis ac inquisita super iis diligentius veritate illos ex eis de quorum negligentia seu contemptu hujusmodi in premissis vel aliquo premissorum vobis constiterit declaretis prout justum fuerit auctoritate nostra in predictas ponas et sententias incidisse et alias super iis ad executionem et aggravationem et aliarum ponarum adjectionem contra ipsos prout justum fuerit procedatis si et prout ac quoties et quandocumque videritis expedire contradictores per censuram Ecclesiasticam appellatione postposita compescendo Testes autem qui fuerint nominati si se gratia odio vel timore subtraxerint censura simili appellatione cessante cogatis veritati testimonium perhibere Non obstantibus tam de duabus dietis in Concilio generali quam felicis Recordationis Bonifacii Pape VIII predecessoris nostri in qua inter cetera cavetur ne [] Vt in precedenti privilegio Datum Avenioni IX Kalendas Maii Pontificatus nostri anno IV