Charter Document - 02110020

Clemens Episcopus servus servorum Dei ad perpetuam Rei memoriam Apostolice servitutis nobis injuncte desuper Officium mentem nostram incitat et inducit ut circa ea que statui prospero Monasteriorum presertim ad Romanam Ecclesiam nullo medio pertinentium ac Beneficiorum et aliorum locorum regularium et personarum sub Religionis habitu vacantium studio pie vite opportuna fore conspicimus et ut Monasteria Beneficia et loca ipsa preserventur a noxiis et feliciter gubernentur operosis studiis intendamus Sane petitio pro parte dilectorum filiorum J Abbatis et conventus Monasterii Cluniac ad eamdem Romanam Ecclesiam nullo medio pertinentis Matisconensis Dioecesis nobis nuper exhibita continebat quod cum olim felicis recordationis Bonifacius Papa VIII predecessor noster statuerit et ordinaverit perpetuis futuris temporibus observandum ut ad supplendum defectus penurias et indigentias ipsorum Abbatis et conventus et ad exonerationem Abbatis dicti monasterii pro tempore existentis quatuor millia Librarum Turonensium parvorum de fructibus reditibus et Proventibus de Lehuno in sanguine terso de Nogento Retrodi de Gacicuria de Gaya de Vergeyo de Vendopera de Mostereto de Marmissa de Turribus supra Maternam de Carennaco de Moyeraco de Roncenaco et de Sancto Cosma Decanatuum qui tunc Prioratus existebant Cluniacensis Ordinis Ambianen Carnoten Trecen Eduen Lingonen Remen Caturcen Agennen Petragoricen et Constantien Diocesum a dicto Monasterio dependentium et per Monachos ejusdem Monasterii solitorum gubernari preter alias pensiones in quibus illos pro tempore obtinentes Abbati et conventui ac Monasterio supradictis quomodolibet tenerentur que per aliquos ipsius Ordinis Monachos per Abbatem dicti Monasterii qui tunc erat et successores suos pro tempore existentes deputandos perciperentur et colligerentur annuatim ac voluerit Prioratus hujusmodi ex tunc in antea Decanatus existere et etiam nuncupari Et propterea eisdem Abbati et conventui plurimum expediat de dictis Decanatibus personis sufficientibus et idoneis per quas Decanatus ipsi utiliter et salubriter gubernari valeant provideri et quandoque Decanatus ipsos per nonnullos Monachos minus idoneos eis spretis qui boni administratores existunt auctoritate litterarum Apostolicarum per quas de Beneficiis Ecclesiasticis cum cura vel sine cura etiamsi Prioratus Decanatus Dignitates Personatus vel Officia existerent per Monachos dicti Monasterii solitis gubernari provideri mandabatur contigerit acceptari et de illis ipsis etiam provideri in magnum Abbatis et conventus ac Decanatuum predictorum prejudicium et etiam detrimentum Quare pro parte Abbatis et conventus predictorum nobis extitit humiliter supplicatum ut providere super hoc de benignitate Apostolica dignaremur Nos igitur attendentes quod in eodem Monasterio viget plurimum observantia regularis operibus pietatis insistitur et Divinus cultus ibidem laudabiliter exercetur ac volentes propterea Abbatis et conventus Monasterii et decanatuum predictorum incommodis precavere ac eorum profectus et commoda quantum cum Deo possumus salubriter procurare hujusmodi supplicationibus inclinati auctoritate Apostolica ex certa scientia tenore presentium quas perpetue constitutionis volumus et decernimus vim habere statuimus et etiam ordinamus quod dicti Decanatus per quoscumque expectantes hujusmodi vigore quarumcumque litterarum Apostolicarum eis sub quacumque forma vel expressione verborum concessarum seu etiam concedenda arum inposterum etiam si de Abbate et conventu Monasterio et Decanatibus predictis ac exemptione Privilegiis et immunitatibus eis ab Apostolica Sede concessis expressam faciant mentionem et etiamsi in eisdem litteris prefatis expectantibus concessis seu in antea concedendis infra scripte videlicet non obstantibus si Abbati et conventui dicti Monasterii predictis vel quibusvis aliis communiter vel divisim a dicta sit Sede indultum quod ad Receptionem vel provisionem alicujus minime teneantur et ad id compelli aut quod interdici suspendi vel excommunicari non possint quodque de dignitatibus personatibus vel officiis aut aliis beneficiis Ecclesiasticis ad eorum collationem provisionem presentationem electionem seu quamvis aliam dispositionem conjunctim vel separatim spectantibus nulli valeat provideri per litteras Apostolicas non facientes plenam et expressam ac de verbo ad verbum de indulto hujusmodi mentionem et qualibet alia dicte Sedis indulgentia generali vel speciali cujuscumque tenoris existat per quam presentibus non expressam vel totaliter non insertam effectus earum impediri valeat quomodolibet vel differri et de quo cujusque toto tenore habenda sit in nostris litteris mentio specialis seu quecumque alie clausule sub quocumque tenore seu expressione verborum inserantur que indulto hujusmodi possent quomolibet in aliquo derogare de cetero non valeant acceptare nec expectantes ipsi de illis sibi facere provideri Districtius inhibentes quibuscumque Executoribus in litteris hujusmodi per Sedem predictam deputatis seu etiam deputandis et quibuslibet aliis communiter vel divisim nec contra statutum et Ordinationem nostram hujusmodi aliquid attentare presumant Nos enim ex nunc quascumque suspensionis interdicti et excommunicationis seu alias sententias atque penas si quas contra ipsos Abbatem conventum aut Monasterium seu quoscumque alios occasione premissorum ferri contigerit seu etiam promulgari irritas decernimus et inanes Nulli ergo omnino hominum liceat hanc paginam nostri statuti Ordinationis voluntatis inhibitionis et constitutionis infringere [] Datum Avenioni VII Kalendas Augusti Pontificatus nostri anno primo