Charter Document - 02110019

Clemens Episcopus servus servorum Dei dilectis filiis Abbati et conventui Monasterii Cluniacensis ad Romanam Ecclesiam nullo medio pertinentis Matisconensis Dioecesis salutem et Apostolicam benedictionem Sacrosancta Romana Ecclesia mater cunctorum fidelium et Magistra in agro virtutum vestri Ordinis cui Altissimus benedixit et in decore sancte Religionis sub qua virtutum Domino gratum impenditis famulatum exultat et jubilat presertim dum prospicit quod vos ad alta virtutum gradibus per exercitium bonorum operum et preclara Sanctitatis merita conscendentes trahitis ad Divine Majestatis obsequia alios per exemplum vitam ducendo purissimam hospitalitatem servando et divine Laudis frequentie celebrisque venerationis instantie ex qua gloria Divine Majestatis attollitur devotissime insistendo propter que nos Ordinem vestrum prefatum quem erga nos et eamdem Ecclesiam devotionis Claritate prelucere conspicimus infra Claustra nostri pectoris paternis affectibus complectentes circa bonum statum ipsius totis studiis vigilamus ut Deo propitio protegatur a noxiis salubria semper incrementa suscipiat necnon pacis et tranquillitatis affluat Ubertate ipseque et persone ipsius ab omni sint perturbatione secure ac a jugo cujuslibet oppressionis serventur illese prerogativa libertatis Apostolice communimus Sane petitio vestra nobis nuper exhibita continebat quod licet vestrum Monasterium cum Abbatiis Prioratibus Decanatibus et aliis membris suis eidem immediate seu mediate subjectis ubilibet constitutis ab olim reputatum fuerit et adhuc etiam reputetur communiter fore a jurisdictione quorumlibet judicum ordinariorum exemptum ac soli immediate Sedi Apostolice subjacere cum personis degentibus in eisdem tamen nobis humiliter supplicastis ut ad evitandum cujuslibet molestie ac inquietationis materiam que vobis contra hujusmodi exemptionis libertatem posset inferri et ut cujuslibet propterea tollatur contra vos occasio malignandi Monasterium vestrum cum Abbatiis Prioratibus Decanatibus et membris et personis predictis pro incremento boni status Monasterii et membrorum ac pace et tranquillitate personarum degentium in eisdem de novo eximere totaliter auctoritate Apostolica dignaremur Nos igitur qui in Monasterio vestro plene novimus premissa et alia multa bona opera et sanctitatis clarere insignia cultumque Divinum Regularem observantiam et Religionis normam inter alia Monasteria relucere illudque multipliciter reflorere in spiritualibus volentes paci et tranquillitati vestre perpetue ac membrorum et personarum eorumdem providere salubriter vosque ac Monasterium et alia membra vestra prerogativa specialis favoris et gratias insignire illaque decorare singularis privilegii titulo intendentes hujusmodi supplicationibus inclinati prefatum vestrum Monasterium cum omnibus aliis et singulis Monasteriis Prioratibus Decanatibus et aliis quibuscumque membris suis utriusque sexus ipsi vestro Monasterio immediate vel mediate subjectis habitis et habendis cum omnibus personis regularibus vestrorum Ordinis et Religionis degentibus in eisdem presentibus et futuris ab omni ordinaria jurisdictione dominio visitatione et potestate qualibet omnium et singulorum Patriarcharum Archiepiscoporum Episcoporum et aliorum quorumlibet judicum ordinariorum Ecclesiasticorum de specialis dono gratie de novo eximimus et totaliter liberamus illaque in jus et proprietatem Beati Petri et Sedis ejusdem et sub eorum speciali et immediata protectione suscipientes et nostra decernimus Monasterium vestrum et omnia et singula alia Monasteria Prioratus Decanatus et alia membra et personas predicta soli et immediate Sedi Apostolice subjacere quodque locorum Ordinarii Diocesani vel alia quevis persona Ecclesiastica in vos Monasteria Prioratus Decanatus et alia membra et personas prefata ut pote prorsus exempta non possint auctoritate ordinaria excommunicationis suspensionis aut interdicti sententias promulgare vel alias etiam ratione delicti seu contractus vel rei de qua agetur ubicumque committatur delictum ineatur contractus aut res ipsa consistat potestatem seu jurisdictionem aliquam quomodolibet exercere felicis memorie Innocentii Pape quarti predecessoris nostri circa exemptionem edita que incipit volentes et omnibus aliis constitutionibus Apostolicis in contrarium editis non obstantibus quibuscumque Nos enim quaslibet excommunicationum suspensionum et interdicti sententias et quoscumque processus quasvis penas et sententias continentes quas et quos contra vos Monasteria Prioratus Decanatus et alia membra et personas predicta contra tenorem et formam exemptionis hujusmodi quomodolibet promulgari et haberi contigerit irritos decernimus et inanes Volumus autem quod vos in signum percepte ab eadem Ecclesia Romana libertatis et exemptionis hujusmodi unam unciam auri dicte Romane Ecclesie in festo Beatorum Apostolorum Petri et Pauli solvere perpetuo teneamini annuatim quodque per presentem exemptionem et alia supradicta libertatibus privilegiis et immunitatibus aliis vestris et Ordinis vestri nullum prejudicium generetur quin imo volumus quod illa in sua plena remaneant firmitate Ceterum non intendimus alicui vel aliquibus per exemptionem et libertatem prefatas in vestrarum ac Monasteriorum Prioratuum ac Decanatuum et membrorum predictorum Ecclesiarum Parochialium visitationibus necnon in perceptionibus tam earum que ratione visitationis predicte debentur quam aliarum antiquarum et solitarum procurationum seu alias absque visitatione debitarum aliquatenus derogare Nulli ergo omnino hominum liceat hanc paginam nostrarum exemptionis liberationis susceptionis constitutionum et voluntatum infringere vel ei ausu temerario contraire Si quis autem hoc attentare presumpserit indignationem omnipotentis Dei et Beatorum Petri et Pauli Apostolorum ejus se noverit incursurum Datum Avenioni Kalendis Aprilis Pontificatus nostri anno primo