Charter Document - 02110017

Ioannes Episcopus servus servorum Dei dilectis filiis Abbati et Conventui Monasterii Cluniacensis Matisconensis Dioecesis salutem et Apostolicam benedictionem Dum diligenter attendimus quod in Monasterio vestro quod ad Romanam Ecclesiam nullo medio noscitur pertinere viget plurimum observantia Regularis operibus pietatis insistitur et divinus cultus ibidem laudabiliter exercetur gratum nostris desideriis redditur ut ipsius precaveamus incommodis ejusque profectibus quantum cum Deo possumus salubriter insistamus Sane frequenti conquestione vestra didicimus quod licet dudum felicis recordationis Bonifacius Pape VIII predecessor noster Apostolica auctoritate statuerit fecerit et ordinaverit perpetuis futuris temporibus observandum ut ad supplendos defectus et penurias vestras [filii Conventus] vestrasque indigentias quaslibet relevandas quibus tunc temporis premebamini necnon ad exonerationem Abbatum qui essent pro tempore Monasterii memorati quatuor millia librarum Turonensium parvorum de fructibus reditibus et proventibus aliquorum Prioratuum Monasterio subjectorum eidem annis percipienda singulis deputarentur que per discretos aliquos et fideles ipsius Cluniacensis Ordinis Monachos per quondam Guillelmum Abbatem dicti Monasterii qui tunc erat et successores ipsius qui essent pro tempore ordinandos integre colligi et percipi voluit et mandavit ac porpterea decreverit et ad hoc auctoritate predicta concesserit donaverit et deputaverit de Lehuno in sanguine terso Ambianen de Nongento Retrodi et de Gassicuria Carnotens de Gaya Trecens de Vergeyo Eduens de Vendopera de Monstreto et de Marmissa Ligonen de Turribus super Maternam Remens de Carennaco Caturcens de Moyriaco Agennens de Roncenaco Petragoricens et de sancto Cosma Constantiens Diocesum Prioratus eidem Monasterio Cluniac subjectos cum omnibus Prioratibus domibus membris grangiis bonis juribus et pertinentiis eorumdem in quibuscumque Diocesibus constitutis ut de ipsorum fructibus reditibus et proventibus universis hujusmodi summa pecunie per illos qui super hoc premisso modo deputati forent perciperetur integre singulis annis ac etiam colligeretur ac voluerit insuper ut Prioratus predicti appellarentur et haberentur de cetero Decanatus prout in litteris predecessoris ejusdem inde confectis plenius continetur Tamen Decanatuum predictorum Decani predicta quatuor millia librarum juxta statutum et ordinationem predicta exhibere et solvere personis ad hec per te [fili Abbas] deputatis in terminis ad hoc assignatis eisdem indebite non curarunt hactenus neque curant propter quod vos gravia perpessi fuistis hactenus et patimini continue detrimenta Sed dicti Decani in diffugium non solvendi in vocem frivole appellationis eruperunt hactenus et erumpunt difficultates super hoc et cavillationes adinvenerunt hactenus et adinvenire procurant Quare pro parte vestra fuit nobis humiliter supplicatum ut vestris et dicti Monasterii super hoc indemnitatibus consulentes adversus contemptores predictos providere vobis super hoc de opportuno remedio dignaremur Nos igitur indemnitatibus ejusdem Monasterii in hac parte providere volentes vestris supplicationibus inclinati auctoritate Apostolica de Consilio fratrum nostrorum statuimus ac etiam ordinamus quod Decani predicti qui sunt et erunt pro tempore hujusmodi quatuor millia librarum ad que tenentur juxta ordinationem predecessoris ejusdem prefato Cluniacensi Monasterio in terminis consuetis solvere teneantur alioquin illi qui in predictis terminis non solverint summam pecunie predictam pro rata quemlibet contingente excommunicationis incurrant sententiam ipso facto Et si post incursionem ejusdem sententie per mensem in sua contumacia persistentes in solutione cessaverint supradicta se Decanatibus noverint ipso facto privatos Nulli ergo liceat hanc paginam nostre voluntatis statuti et ordinationis infringere [] Datum Avenioni Kalendis Maii Pontificatus nostri anno XI