Charter Document - 02110016

Ioannes Episcopus servus servorum Dei ad perpetuam rei memoriam Dum diligenter attendimus quod Apostolica Sedes ad Monasterium Cluniacense quod ad Romanam Ecclesiam nullo medio noscitur pertinere Matisconensis Dioecesis ab ipsius Monasterii fundationis exordio precipuum gerens dilectionis affectum ipsum maternis fovit amplexibus ejus precavit dispendiis et illud de bono semper in melius benigno favore provexit gratum nec immerito redditur votis nostris ut eidem Monasterio ne in suis juribus et reditibus defraudetur opportunis adesse favoribus et consiliis studeamus Sane sicut accipimus pro eo quod Priores Decani et alii administratores Ordinis Cluniac censas vicesimas redditus pensiones et obventiones alias dilectis filiis Abbati et Conventui ejusdem Monasterii debitas ab eisdem statutis terminis et temporibus non persolvunt multi defectus et damna hactenus prefatis Abbati et Conventui ac Monasterio provenerunt quodque prefata Sedes quandoque voluerit et concesserit quod Priores Decani et alii administratores prefati tempore debito dictas censas vicesimas redditus pensiones et obventiones alias non solventes possent ad Romanam Curiam personaliter evocari nullus tamen ex concessione hujusmodi provenit fructus propter appellationes et malitias plurimorum Volentes igitur eorumdem obviare malitiis et dictorum Abbatis et Conventus ac Monasterii super his indemnitatibus providere Prioribus Decanis et aliis administratoribus prelibatis qui censas vicesimas redditus pensiones et obventiones alias eisdem Abbati et Conventui certis terminis solvere et assignare tenentur presentis perpetue ordinationis edicto de fratrum nostrorum consilio sub pena suspensionis ab officio et beneficio districte precipimus et mandamus ut censas vicesimas redditus pensiones et obventiones predictas eisdem Abbati et Conventui efficaciter solvant in terminis constitutis Alioquin si post obtentam hujusmodi mandati nostri et ordinationis notitiam in hujusmodi solutione defecerint in terminis supradictis eos predictam suspensionis sententiam incurrere volumus ipso facto et tamdiu manere suspensos donec plenariam satisfactionem fecerint de premissis qua satisfactione prestita eo ipso quoad illos a quibus fuerit prestita satisfactio supradicta sit predicta suspensionis sententia relaxata Si autem post terminum in quo defecerint in solutione predicta per unum mensem dictam suspensionis sententiam sustinuerint animo indurato fructus Prioratuum Decanatuum et aliarum administrationum quos et quas obtinent per executores quos super iis per alias nostras litteras providimus deputandos appellatione postposita precipimus sequestrari ac de fructibus taliter sequestratis juxta delicti quantitatem ad quam Priores Decani et alii administratores predicti quorum Prioratuum Decanatuum et aliarum administrationum fructus sequestrati fuerint tenebantur eisdem Abbati et Conventui satisfactionem plenariam exhiberi Nulli ergo omnino hominum liceat hanc paginam nostrorum precepti mandati et voluntatis infringere [] Datum Avenione Kal Julii Pontificatus nostri anno VIII