Charter Document - 02110014

Ioannes Episcopus servus servorum Dei dilectis filiis Raymundo Abbati et majori et claustrali Prioribus Monasterii Cluniacensis et Matisconensis Dioecesis salutem et Apostolicam benedictionem Viri sub religionis habitu virtutum Domino famulantes maxime qui scientie dono et studii virtutum insistunt favoris Apostolici gratiam promerentur et eo benignius decet ipsorum petitionibus annui quo major ex eorum studiis potest utilitas provenire Sane pro parte dilectorum filiorum scholarium Ordinis vestri Parisis studentium in Theologia fuit nuper expositum coram nobis quod licet quedam domus in civitate Parisiensi ad opus scholarium ipsius Ordinis ibidem in ipsa facultate Theologica studentium per ipsum Ordinem fundata fuerit ab antiquo ibique certus studentium ipsius Ordinis numerus ponendorum per certas personas ejusdem Ordinis ordinatus ac pro necessariis expensis ipsorum studentium pensio quindecim librarum Parisiensium horum cuilibet annis singulis per easdem personas dicti Ordinis persolvuenda fuerit deputata malitia tamen temporis faciente quod a pluribus elapsis jam annis maximam in partibus illis sterilitatem induxit deputata ipsis hujusmodi pensio non suffecit hactenus nec sufficit ad ipsorum victum annuum quantum libet mandatum moderatum nec etiam de ipsis quindecim libris satisfactio fit ad plenum quamvis idem Ordo plurimum abundare noscatur propter que prefati studentes necessario coguntur inceptum per eos dimittere studium in eorum ac totius Ordinis ipsius qui viris litteratis plurimum indigere dignoscitur dispendium et jacturam quare pro parte ipsorum fuit nobis humiliter supplicatum ut ad hujusmodi eorum indigentiam relevandam et quod diligentius intendere valeant studiis providere super his de benignitate Sedis Apostolice dignaremur Nos itaque ipsorum et tuis fili Abbas qui etiam nobis supplicasti petitionibus inclinati discretioni vestre per Apostolica committimus et mandamus quatenus vos vel duo aut unus vestrum circa ipsorum studentium penuriam relevandam sollicite intendentes ac ipsis pensiones easdem facientes ex integro exhiberi considerata presentis temporis qualitate sic eas authoritate Sedis Apostolice prout et in quantum discretioni vestre videbitur adaugere curetis quod studentibus ipsis studendi et proficiendi non subtrahatur materia nec ipsos oporteat super his ad nos iterato habere recursum contradictores per censuram Ecclesiasticam appellatione postposita compescendo non obstante si aliquibus communiter vel divisim a predicta sit Sede indultum quod interdici aut excommunicari nequeant aut suspendi per litteras apostolicas non facientes plenam et expressam ac de verbo ad verbum de indulto hujusmodi mentionem Datum Avenione sexto decimo Kalendas Augusti pontificatus nostri anno tertio