Charter Document - 02110011

Clemens Episcopus servus servorum Dei dilectis filiis Trenorchiensi Cabilonens Dioces et sancti Martini Eduens Monasteriorum Abbatibus ac Priori sancti Petri Matisconensis salutem et Apostolicam benedictionem Personam dilecti filii Henrici Abbatis Monasterii Cluniac ad Romanam Ecclesiam nullo medio pertinentis precipua benevolentia prosequentes libenter illam specialibus gratiis honoramus ut quanto magis Sedem Apostolicam sibi favorabilem invenerit tanto devotius eam studeat revereri Sane petitio dicti Abbatis nobis exhibita continebat quod Monasterium ipsum Cluniacense debitorum onere adeo erat oppressum quod nisi per salubria Sedis Apostolice remedia celeriter succurreretur eidem vix adjicere posset ut resurgeret Quare dictus Abbas nobis humiliter supplicavit ut super hoc sibi et eidem Monasterio providere paterna sollicitudine curaremus Nos igitur diligentius attendentes quod quanto ipsum Abbatem amplius abundare contingeret tanto facilius et efficacius procedere poterit ad conservationem bonorum et jurium ac ad debitorum exonerationem Monasterii supradicti volentes quoque ut favorem Apostolicum sibi fructuosum sentiret et perciperet per effectum fructus redditus et proventus primi anni omnium Monasteriorum Prioratuum et Domorum ipsi Monasterio Cluniacensi mediate et immediate subjectorum necnon et aliarum Ecclesiarum Officiorum et Beneficiorum tam secularium quam Regularium ad collationem vel presentationem suam et aliorum Abbatum Priorum et conventuum ac aliarum personarum Ordinis memorati spectantium si qua tunc vacarent et usque ad quadriennium vacare contingeret auctoritate Apostolica eidem Abbati concessimus percipiendos et convertendos ab ipso in solutionem debitorum Monasterii supradicti dilecto filio Abbate Monasterii Moysiacensis dicti Ordinis Caturcensis Diocesis eidem Monasterio immediate subjecti et Prioribus nullo mediante subjectis eidem Monasterio Moysiacensi dumtaxat exceptis Non obstantibus quibuscumque Diffinitionibus renuntiationibus pactionibus et conventionibus per eumdem Abbatem Cluniacensem et suum conventum cum Abbatibus Prioribus ac aliis personis predictis factis vel habitis quibus ipsum et dictum conventum voluimus non teneri Proviso ut Monasteria Prioratus Ecclesie Domus officia et beneficia hujusmodi debitis obsequiis non fraudentur et animarum cura in eis quibus illa imminet nullatenus negligatur Quocirca discretioni vestre per Apostolica scripta mandamus quatinus vos vel duo aut unus vestrum per vos vel alium seu alios predictos fructus redditus et proventus faciatis auctoritate nostra eidem Henrico Abbati vel Procuratori suo ejus nomine juxta hujusmodi nostre concessionis tenorem per idem quadriennium integre ministrari contradictores per censuram Ecclesiasticam appellatione postposita compescendo Nonobstantibus supradictis seu si aliquibus a Sede Apostolica sit indultum quod interdici suspendi vel excommunicari non possint per litteras Apostolicas non facientes plenam et expressam ac de verbo ad verbum de indulto hujusmodi mentionem Datum Avenioni VIII Idus Maii Pontificatus nostri anno IV