Charter Document - 02110009

Clemens Episcopus servus servorum Dei dilecto filio Ecclesie sancti Stephani de Giscone Montis Albani salutem et Apostolicam benedictionem Significavit nobis dilectus filius Prior Prioratus sancti Lupi de Asserento Ordinis Cluniacensis Belvacensis Dioecesis quod nonnulli filii iniquitatis quos prorsus ignorat decimas redditus census terras domos vineas prata pascua nemora instrumenta publica et nonnulla alia bona ad Prioratum predictum spectantia temere ac malitose occultare et occulte detinere presumunt non curantes ea prefato Priori exhibere in animarum suarum periculum et ipsorum Prioris et Prioratus non modicum detrimentum super quo idem Prior Apostolice Sedis remedium imploravit Quocirca discretioni tue per Apostolica scripta mandamus quatenus omnes hujusmodi detentores occultos decimarum reddituum censuum et aliorum bonorum predictorum ex parte nostra publice in Ecclesiis coram populo per te vel per alium moneas ut infra competentem terminum quem eis prefixeris ea predicto Prioris a se debita restituant et revelent ac de ipsis plenam et debitam ei satisfactionem impendant Et si id non impleverint infra alium competentem terminum quem eis ad hoc peremptorie duxeris prefigendum ex tunc in eos generalem excommunicationis sententiam proferas et eam facias ubi et quando expedire videris usque ad satisfactionem condignam solemniter publicari Datum Avenioni tertio Kalendas Maii Pontificatus nostri anno primo