Charter Document - 02110006

Bonifacius Episcopus servus servorum Dei dilecto filio Bertrando Abbati Monasterii Cluniacens ad Romanam Ecclesiam nullo medio pertinentis Cluniacensis Ordinis capitis Matisconens Dioecesis salutem et Apostolicam benedictionem Paterne dilectionis affectus quem ad te tue devotionis exigentibus meritis tuumque Monasterium et Cluniacensem Ordinem gerimus excitat mentem nostram ut personam tuam necnon Monasterium et Ordinem prelibata specialibus honoremus gratiis ac prosequamur favoribus gratiosis Nuper siquidem quondam sceleratissimi et omnium mortalium pessimi Petri Flote tanquam publici hostis Ecclesie et divine ac humane lese Majestatis Rei ejus gravibus et nefandis criminibus exigentibus damnantes memoriam filios ipsius sive seculares clerici sive Regulares existerent Ecclesiis Prioratibus officiis prebendis pensionibus et beneficiis omnibus Ecclesiasticis que obtinebant quocumque nomine censeantur cunctisque gratiis Apostolice Sedis si quas quomodolibet haberent privavimus ipsosque et alios ejus natos usque in quartam generationem ad obtinenda Ecclesiastica beneficia reddidimus inhabiles et indignos Vt autem predicta quibus privati fuerant non diu vacarent ipsa omnia ea vice collationi Sedis predicte duximus reservanda decernentes irritum et inane si secus post conscientiam dictorum criminum quia id in fraudem et ex suspicione infligende pene lese Majestatis factum presumpsimus attentatum esset vel imposterum scienter vel ignoranter contingeret attentari prout in litteris nostris processum nostrum super hoc continentibus hec omnia plenius continentur Cum autem sicut accepimus nonnulli ex eisdem filiis Regulares et seculares clerici Prioratus Ecclesias ac beneficia Ecclesiastica cum cura et sine cura dicti Ordinis et ad collationem presentationem Electionem vel aliam dispositionem tuam vel aliarum personarum ejusdem Ordinis spectantia tempore privationis hujusmodi obtinuerunt Nos volentes tuam in hac parte premissorum consideratione honorare personam illamque tibi impendere gratiam per quam te possis etiam aliis reddere gratiosum conferendi hac vice Prioratus Ecclesias et beneficia predicta dicti Ordinis ad tuam vel aliorum ipsius Ordinis Personarum collationem presentationem Electionem vel aliam quamcumque dispositionem pertinentia que per hujusmodi nostram privationem vacarunt personis idoneis singula videlicet singulis ac inducendi eas in illorum corporalem possessionem et inductus etiam defendendi necnon faciendi eas ad ipsa prout est moris admitti eisque de eorum fructibus et proventibus responderi Contradictores quoscumque per censuram Ecclesiasticam appellatione postposita compescendi Nonobstantibus Reservatione et decreto predictis aut si aliquibus ab eadem sit Sede indultum quod excommunicari suspendi vel interdici non possint per litteras dicte Sedis non facientes plenam et expressam ac de verbo ad verbum de indulto hujusmodi mentionem seu quibuscumque Privilegiis litteris et indulgentiis Apostolicis generalibus et specialibus quibuscumque et in quacumque forma verborum concessis per que hujusmodi tibi facta gratia posset quomodolibet impediri et de quibus quorumque tenoribus debeat in nostris litteris fieri mentio specialis plenam et liberam tibi concedimus tenore presentium facultatem Ceterum quia nostre intentionis existit ut filii ac posteri eorum prefati non solum a predictis de quibus conferendis tibi potestas harum auctoritate conceditur sed etiam ab emolumentis et subsidiis quoquomodo provenientibus ex eisdem penitus excludantur Tibi in virtute obedientie districte precipimus et mandamus quatenus ea omnia talibus studeas conferre personis per quas nomine pensionis vel alterius cujuscumque obventionis ipsis vel eorum alicui directe vel indirecte non possit exinde aliquod emolumentum lucrum vel subsidium quomodolibet provenire sciturus pro certo quod si contrarium quod non credimus forte presumeres non solum gratie Revocationem presentis sed forsan privationis ac depositionis penam poteris non immerito formidare Datum Laterani tertio nonas Novembris Pontificatus nostri anno octavo Habetur et alia Bulla ejusdem Pontificis Data Laterani XIX Kalendas Ianuarii Pontificatus anno VIII directa Abbati Monasterii S Trinitatis Florentinensis et Cantori Morinensis ac cuidam Radulpho Canonico Parisiensis Ecclesiarum In qua fit mentio quomodo idem Pontifex permisit Bertrando Abbati Cluniacensi ut mutuaretur summam tredecim millium florenorum auri a quibusdam Mercatoribus Florentinis de societate Spinorum pro expediendis negotiis Monasterii et Ordinis Cluniacensis apud Sedem Apostolicam Quam Bullam confirmat Benedictus Papa XI sua alia Bulla eam continente insertam data Laterani II Idus Ianuarii Pontificatus anno primo