Charter Document - 02080108

Au nom de notre Soignour amen Nous Eudes Li Changerres bailliz d'Ostun et de Moncenis faceons savoir à tous cels qui verront et orront ces présentes lettres que comme descors fust entre religieuses personnes l'abbey et le couvent de Saint Martin d'Ostun et les homes et habitans de Dignay d'une part et noble home Hug soignour de Monestoy Damoiseaul d'autre part sius plusours descors quereles et controverses qu il havoient l'uns contre l'autre de plusours chouses dont mencions est cy dessos faite l'an de grâce corrant mil trois cens vingt et sex le dyemoinge après la feste de la Purification Notre Dame la Virge en jugement à Ostun par devant nous suis les dix descors quereles et controverses fait ordenez et accordez entre Richart de Montreal procurour des diz religieux fondé de procuration sealée des seaulx dou dit abbey de Saint Martin dou quel li diz covanz use dont li tenours est cy dessoz escripte en non de procurour d'autre part et por eulx et por li diz homes et habitans de Dignay por lesquelz li diz procurour en non que dessius prenant en main d'une part et li dit Hug soignour de Monestoy por soy d'autre part pour ce presenz et estanz en jugement à Ostun par devant nous en la menere qui sanseit Premièrement la justice et la soignerie grant et petite que li diz sires de Monestoy demandait au terreour et es terres que si suy les hommes enfint comme eles se portent dois les prez qui sont par devers le rup qui fiert en l'estang jusques ès bornes sont mises entre celes terres et le boys Dou Deffans est demore ès diz religieux jusque ès prez li justice des queulz comme ils se portent par devers Monestoy domore au dit Hug et est assavoir que li blaers dou dit Hugue porra gaigier cels qu il trovera en domaige es dites terres par telle menère qu il pourtoit les gaiges et bailloit à la justice de Dignay por faire randre le domaige qui fait y saront és hommes de Monestoy et les amandes ès diz religieux et sara crehuz en ce cas li diz blaers aussi come li lours propres et par ce moiens li blaers et li sergens des diz religieux n'an laisseront pas à gaigier et officier ès dites terres quant li cas y aviendront Li droiz que li sires de Monestoy puent havoir à l'antraigier des dites terres ou por le remuaige d'y celles ou por autre forfaiture ou por le cas de la main morte qu il hay en ses hommes li demore saulfz et li droitz que li diz religieux de lors hommes de Dignay hont au pasturaige des près dessus diz ou autre part en la justice de Monestoy et de pauchier au rup dessus dit et les droictures aussi qu il hont ou puent havoir en quelques rantes que ce soient ou en hérétaiges en la justice de Monestoy lor demore aussi saulfz Item li sires de Monestoy ne demandera rien de cy en avant en la justice de la ville de Dignay dou terreoure ne des appartenances saulf à luy chouses qui cy dessoz sont spécifiées Item les bornes enfin comme elles se portent par devers la couhe de l'estang demorront à la fin qu elles y furent mises c est assavoir que la chaucie de l'estang ne se puisse tant lever que l'aigue passoit les bornes Item li hommes de Dignay feront chascun an por li soignour de Monestoy quatre charroins francs chascun charroin d'un tonneaul de vin Et assavoir que li sires de Monestoy por aulx ne por lors bestes ne por lor vivre ne sera tenuz d'aulx rien administrer Et feront ces charroins por les vins dou dit soignour ou d'autres qu il li plaira amener de Beaune de Pomard de Volenay de Murissault ou des viles voisines en ceay jusque à Monestoy non pas outre et feront ces charroins entre la feste St Denis et la Nativitey notre Soignour toutes les fois queils en seront requis et lor fera lon savoir cinc jor devant et s'ils ne puent faire les quatre charroins à une foiz il les feront à doubes et de cette non puissance seront crehuz sex des prudhomes de la vile por lors sarremens Por le deffaut de chascun charroin qui il ne feroient li sires de Monestoy la justice dou leu requise porra gaigier d'un buef ou d'un chevaul ou d'aultres gaiges en value de soixante solz et mettre por devers luy por son intérêt et por son domaige et por l'amande de cinc sols por un chascun deffaut dou quel il sarait crehuz por son sarrement jusque à vint sols et se pluz en demandoit il sarait tenuz de prover le pluz par devant la justice de Dignay ne ne sarait tenuz de recroire les gaiges que pris en hauroit la preuve pendant sius le plus des vint solz jusque à ce que des vint sols li fust faite satisfacions Et se il estoit dehuz de la paye dou charroin pour quoy li gaiges saroit pris ou des vint sols pour quoy il ne fuissient dehuz lay où la recréance se daurait faire l'on la ploigerait en sa main par tel qui sarait et sarait de sa contrainte en ces charroins faire Ne saront en riens tenuz li frans de la vile qui ne l'ont acostumé de faire Li homes de Dignay payeront chascun an l'avoyne au soignour de Monestoy cils qui la doient et sius la chouse qu il la doient és termes accoutumés et porra li sire de Monestoy la justice dou leu apelée par ses gens faire gaigier cels qui li défaudront et non autres et mettre les gaiges par devers luy et por l'avoyne et por les cinc sols qu il doient por chascun deffaut enfint comme la lettre ancienne qui sur ce en est faite le devise Li homes de Dignay qui useront de faux en fenoisons et qui faucheront por autruis ou hauront entancion de faucher por autruis se il estoit qui les meist en euvre tant au finoige de Dignay comme autre part dont il saront crehuz por lors sarremens feront chascun an une corvée à faucher ès près de Monestoy por ledit soignour et aussi por li deffaus li feroit gaigier por ses gens la justice dou leur requise li sires de Monestoy et tienroit les gaiges jusques à tant que por son interest cils qui hauroit deffailli li hauroit payé doux sols de parisis por la jornée comme por la jornée comme por l'amande Les lettres anciennes enfint comme elles pallent des chouses dessius dites tant por l'une partie cum por l'autre sarontestaubles et demorront en lor valour saulf le traictié et l'acort qui se fait por ces présentes lettres qui sont faites acordées et consantues du dit Hugue Soignour de Monestoy por lui et por ses successours et dou dit procureur en nom comme dessus et nous hont requis et supplié y celles parties que nous en ce présent acort et traictié afin qu il vaille et demoroit perpetuellement forz estauble meissiens notre auctoritey et notre décrest enfint faicte en jugement par devant nous ce présent accort et ce présent traictié enfint faict et consantu en jugement por devant nous des dites parties afin qu il vaille et demoroit perpétuellement forz estauble lohons ratiffions et approvons et y mettons notre auctoritez et notre décrest et en tesmoignaiges de ces chouses les dites parties hont requis supplié et volu que li seaulz de nos bailliaiges d'Ostun et de Moncenis li seaulx dou dit abbey li seaulx dou quel use li diz covanz et li seaulz dou dit Soignour de Monestoy soient mis en ces présentes lettres et és samblaubles et nos Eudes bailde Moncenis ensamble li diz seoulz dou dit abbey et dou quel use li diz covanz et le seaul dou dit soignour de Monestoy ès prières et requestes des dites parties et nous abbés notre seaulx et nous covanz le seaul de St Martin dou quel nous usons et je Hugue sires de Monestoy dessuz diz le mien seaul ensemble le seaul des diz bailliaiges dessus diz havons mis en ces présentes lettres et és semblaubles faites et données en jugement por devant nous bailliz dessus dit si comme dessus est dit présens frère Guillaume priour d'Anzey frère Hugue chamberer frère Estienne priour de Crie frère Hugue Milot Haymonin de Saudon moynes de St Martin dessus dit monsieur Pierre de Mont Jehu chevalier monsieur Andrier curié de Cropeaulx prioure maistre Thibault de saint Thibault clerc Jean Pourchot d'Ostun et plusours autres tesmoins à ce appelés l'an et le dyemoinge dessus diz