Charter Document - 02070100

Universis presentes litteras inspecturis Hugo miseratione divina episcopus Eduensis salutem in Domino sempiternam Noveritis quod nos attendentes domum Sancte Yllarii de Fontanis Cabilonensis dyocesis quam domum a priore et conventu de Barro nostre dyocesis Eduensis habuerimus ex causa permutationis facte inter nos et dictos priorem et conventum esse vicinam et propinquam domui et possessionibus de Fontanis domini episcopi Cabilonensis ipsamque domum Sancti Yllarii fore magis utilem ecclesie et sedi Cabilonensi quam ecclesie et sedi Eduensi et quod ex vicinitate et propinquitate hujusmodi inter dictas ecclesias et sedes littes et discordie possent frequentes oriri nos deliberatione super hoc plenius habita volentes et affectantes littes et discordias evittare de consensu et voluntate venerabilium virorum decani et capituli Eduensis pro utilitate evidenti nostre ecclesie Eduensis dictam domum Sancti Yllarii pertinencias et appendicias et jura quecumque ipsius domus Sancti Yllarii damus tradimus et concedimus in permutationem seu excambium reverendo in Christo patri domino Guillermo Dei gratia Cabilonensi episcopo et successoribus suis episcopis Cabilonensibus et sedi episcopali Cabilonensi in perpetuum tenendas et pacifice habendas pro quinquaginta libratis terre in blado et vino annui redditus ad Viennensem quas quinquaginta libratas terre dictus dominus Cabilonensis episcopus nobis et sedi nostre episcopali Eduensi assedit et assignavit de voluntate et consensu venerabilium virorum decani et capituli Cabilonensis in decima seu decimatione sua de Givreyo et in fructibus ac exitibus dicte decime seu decimationis sue tam bladi quam vini ita videlicet quod dictus episcopus Cabilonensis et successores sui predicti tenentur bona fide solvere reddere et deliberare nobis et successoribus nostris predictis vel mandato nostro apud Givreyum annis singulis tempore messium viginti bichetos frumenti decem et octo bichetos siliginis et triginta bichetos avene ad mensuram Cabilonensem et tempore vindemiarum triginta modios vini ad dictam mensuram de dicto decima seu decimatione de Givreyo bladi et vini et de fructibus et exitibus decime seu decimationis supradicte ita tamen quod quantotieus dictus episcopus Cabilonensis vel successores sui prefati assedebunt vel assignabunt nobis vel successoribus nostris episcopis Eduensibus quinquaginta libratas terre annui redditus ad Viennensem in blado et vino in villa Sancti Dyonisii in Vallibus vel in loco propinquiori dicte ville quam sit Givreyum vel de voluntate nostra aut successorum nostrorum predictorum alibi dictus dominus episcopus Cabilonensis et successores sui predicti et dicta decima seu decimatio ac fructus et exitus ipsius liberi erunt et immunes a solutione bladi et vini predictorum et a quinquaginta libratis predictis quas in blado et vino apud Givreyum nobis solvantur prout in litteris sigillatis sigillis dictorum episcopi decani et capituli Cabilonensis quas nobis super hoc tradiderunt plenius continetur devestientes nos de dicto domo Sancti Yllarii et de reditibus exitibus fructibus et proventibus pertinentiis et appenditiis et de juribus omnibus ipsius domus et dictum dominum episcopum Cabilonensem investimus per presentes litteras de eisdem ita tamen quod dictus Cabilonensis episcopus et successores sui tenentur facere desserviri in capella dicte domus per aliquem religiosum et ad cetera onera ipsius domus tenentur in futurum promittentes pro nobis et successoribus nostris predictis omnia predicta et singula tenere firmiter et inviolabiliter observare [] In quorum robur et testimonium omnium predictorum nos dictus episcopus Eduensis sigillum nostrum et nos decanus et capitulum Eduensis predicti sigillum Sancti Nazarii Eduensis quo utimur duximus apponendum Datum anno Domini MCC nonagesimo octavo mense julii