Charter Document - 02070096
| Charter Number: | 02070096 |
|---|---|
| Cartulary Title: | Cartulaire de l'Evêché d'Autun |
| Charter Language: | Latin |
| Charter Origin: | Religious |
| Charter Type(s): | Renunciation |
| Date: | 1297 |
| Date type: | Internal, A.D. |
| Resource Link(s): |
|
Charter:
Universis presentes litteras inspecturis Hugo miseratione divina episcopus Eduensis salutem in Domino Noveritis quod cum religiosi et discreti viri abbas et conventus monasterii de Fonteneto ordinis Cisterciensis Eduensis dyocesis de quibusdam vineis quas habent in finagio de Alisia et de Flavigniaco nobis decimam vini solvere tenerentur nos de valore hujus decime plenius informati videlicet quod ultra tres modios vini anno quolibet non valebat considerata circa hec utilitate nostre ecclesie Eduensis damus tradimus concedimus et quittamus dictis religiosis et monasterio suo predicto imperpetuum dictam decimam vini dictarum vinearum suarum quas habent et habebant in predictis finagiis usque ad confectionem presentium litterarum pro tribus modiis vini boni et mercabilis ad mensuram de Flavigniaco solvendis nobis et successoribus nostris vel mandato nostro a dictis religiosis vel mandato eorumdem anno quolibet imperpetuum in celario suo de Alisia infra festum Omnium Sanctorum et dictos religiosos et eorumdem monasterium quittamus perpetuo a dicta decima pro tribus modiis antedictis volentes et concedentes quod ipsi religiosi vel mandatum eorumdem possint anno quolibet inperpetuum vineas suas facere vindemiari quas habent in dictis finagiis quancito homines nostri de Alisia vindemiabunt vel vindemiari facient vineas suas de Alisia Promittentes pro nobis et successoribus nostris contra predicta non venire sed ea omnia et singula firmiter et inviolabiliter observare In cujus rei testimonium sigillum nostrum presentibus litteris duximus apponendum Datum apud Alisiam anno Domini MCC nonagesimo septimo mense augusti