Charter Document - 02070068

In nomine Domini amen Anno incarnationis ejusdem MCC octogesimo tertio die lune post festum omnium sanctorum indictione XII pontificatus domini Martini pape quarti anno tertio per presens instrumentum cunctis evidenter appareat quod in presentia magistri Johannis de Parisius dicti de Campis clerici sacrosancte romane ecclesie publici auctoritate notarii et testium subscriptorum ad hoc vocatorum et rogatorum presentibus etiam magistro Humberto de Chargeyo et Johanne Baconerii clericis auctoritate apostolica publicis notariis ad hoc vocatis specialiter et rogatis magister Egidius clericus procurator reverendi in Christo patris domini Jacobi Dei gratia episcopi Eduensis gerentis administrationem archiepiscopatus Lugdunensis ipsius sede vacante coram venerabili patre religioso fratre Jocerando abbate Athanacensi Lugdunensi ordinis Sancti Benedicti procuratorio nomine ejusdem domini episcopi dixit et protestatus fuit et eidem abbati inhibuit et quedam alia eidem in scriptis obtulit in hunc modum Coram vobis domine Jocerande abbas Athanacensis Lugdunensis dico ego magister Egidius clericus et procurator reverendi in Christo patris Jacobi Dei gratia episcopi Eduensis gerentis administrationem archiepiscopatus Lugdunensis ipsius sede vacante et protestor nomine procuratorio nomine ipsius domini episcopi Eduensis quod actum fuit expresse in compromisso facto inter ipsum dominum episcopum Eduensem ex una parte et capitulum Lugdunense ex altera super administratione sedis archiepiscopalis Lugdunensis quod forma dicti compromissi debebat dictari ordinari et concordari ac in scriptis fieri et redigi per duos arbitros a dictis partibus electos videlicet per dominum Guillermum de Verneto sacristam Sancti Justi Lugdunensis et per dominum Gaufridum de Malleyo archidiaconum Belnensem et deinde sigillari sigillo dicti capituli et sigillo officialis Lugdunensis et ubi dictus dominus episcopus videret sigillum predicti officialis sui Lugdunensis ipse apponeret suum proprium sigillum Item expresse actum fuit in dicto compromisso quod predicti duo arbitri debebant tractare ordinato primitus [] dictum est predicto compromisso super discordia dictarum partium super administratione predicta per ipsos arbitros secundum quod eis de jure videretur sopienda et si concordarent insimul servaretur a partibus quod ab ipsis arbitris esset concordatum et si in unum non possent dicti arbitri concordare referre debebant illud in quo discordarent ad vos domine abbas desuper electum a dictis partibus sub forma predicta et ex tunc vos super questione seu discordia predicta tractare et procedere debebatis secundum quod vobis de jure videretur Item actum fuit expresse in dicto compromisso quod dicti duo arbitri vel vos si ipsi discordarent debebatis partibus predictis presentibus arbitrium vestrum seu pronuntiationem vestram proferre unde cum forma predicti compromissi non fuerit ordinata dictata et concordata a dictis duobus arbitris nec scripta nec sigillata ut premissum est nec per dictum dominum episcopum steterit nec adhuc stet quominus ita factum fuerit seu adhuc fiat Item cum dicti duo arbitri non tractaverint insimul super dicta discordia sopienda nec per dictum dominum episcopum steterit nec adhuc stet quominus tractaverint vel adhuc tractent Item cum nichil a dictis duobus arbitris in quo discordarent ad vos relatum sit et sic ad vos non sit aliqua potestas super premissis devoluta Item cum dictus dominus episcopus non sit presens nec possit commode interesse utpote vocatus ad majus tribunal videlicet a domino rege Francie apud Biturigas in proximo festo beati Martini hyemalis cui regi est juramento astrictus nec a vobis citatus fuerit seu vocatus ego predictus procurator procuratorio nomine ipsius domini episcopi Eduensis inhibeo vobis domine abbas ne vos contra formam predictam ipsius compromissi procedatis nec aliquid ordinare seu pronunciare attemptetis quod si secus facere presumpseritis ex hac causa ego prefatus procurator procuratorio nomine ipsius domini episcopi Eduensis protestor et dico et habeo vos suspectum offerens me nomine quo supra paratum esse eligere arbitros qui de predicta causa suspicionis cognoscant secundum formam juris offerens etiam me nomine quo supra paratum probare ydoneo loco et tempore competenti et coram quo debebo supradicta omnia et singula que in facto consistant si negaverit pars adversa item non recedendo a premissis si vos domine abbas contra predictam formam compromissi et contra predictam inhibitionem aliquid pronunciaveritis aut ordinaveritis seu aliquid aliud contra dictum dominum episcopum presumpseritis attemptare ego prefatus procurator protestor nomine quo supra ipsum dominum episcopum velle agere contra vos loco et tempore actione ex quasi delicto tum sit contra predicta faciendo vos faceritis litem vestram et vos hic astentes super premissis vos in testes invoco et vos magistrum Humbertum de Chargeio et Johannem Baconerii clericos auctoritate apostolica publicos notarios requiro ut super premissis faciatis et detis michi publicum instrumentum Actum Lugduni in domo archiepiscopali Lugdunensi anno die indictione ac pontificatu et hora predictis presentibus et ad hoc vocatis testibus et rogatis domino Guillermo Capelli monacho Athanacensi priore de Velchia fratre Thoma priore de Botavilla magistro Matheo de Breno magistro Petro de Varey domino Petro Darz preceptore domus pontis Rodani Lugdunensis domino Stephano de Cluniaco sigillifero curie officialis Lugdunensis et Hugone de Bysuncio clerico ac pluribus aliis