Charter Document - 02070066
| Charter Number: | 02070066 |
|---|---|
| Cartulary Title: | Cartulaire de l'Evêché d'Autun |
| Charter Language: | Latin |
| Charter Origin: | Religious |
| Charter Type(s): | Pledge |
| Date: | 1283 |
| Date type: | Internal, A.D., Feast, Papal |
| Resource Link(s): |
|
Charter:
In nomine Domini amen Anno incarnationis ejusdem MCC octogesimo tertio die lune in octabis festi omnium sanctorum indictione XII pontificatus domini Martini pape quinti anno tertio per presens instrumentum cunctis evidenter appareat quod in presentia magistri Johannis de Parisius dicti de Campis clerici sacrosancte romane ecclesie publici auctoritate notarii et testium subscriptorum et rogatorum presente etiam Johanne Baconerii clerico auctoritate apostolica publico notario ad hoc vocato specialiter et rogato magister Egidius clericus et procurator reverendi in Christo patris Domini Jacobi Dei gratia episcopi Eduensis in scriptis provocavit et appellavit ad sedem apostolicam in hunc modum Cum reverendus in Christo pater Dominus Jacobus Dei gratia episcopus Eduensis gerens administrationem archiepiscopatus Lugdunensis ipsius sede vacante sit in pacifica possessione vel quasi administrationis predicte tam in spiritualibus quam temporalibus sicut sibi competit ab antiqua consuetudine approbata ego magister Egidius clericus et procurator dicti domini episcopi ne vos capitulum Lugdunense aut aliquis alius dictum dominum episcopum et suos perturbetis impediatis perturbari vel impediri faciatis aut procuretis quominus ipse dominus episcopus et sui utantur pacifice predicta possessione vel quasi contra vos dictum capitulum et contra quoscumque alios contradictores impedientes aut etiam perturbantes seu turbari vel impediri facientes aut procurantes nomine procuratorio ipsius domini episcopi Eduensis ad sedem apostolicam in hiis scriptis coram vobis hic astantibus et coram vobis magistro Johanne de Parisius et Johanne Baconerii clericis auctoritate apostolica publicis notariis provoco et appello predictum dominum episcopum et suos res et bona sua et predictam administrationem sedis archiepiscopatus Lugdunensis protectioni dicte sedis supponens et vos hic astantes super premissis testes invoco et vos predictos notarios publicos requiro ut super premissis et predicta appellatione faciatis et detis michi publicum instrumentum Actum Lugduni in capitulo Lugdunensi in loco in quo dictum capitulum congregari more solito consuevit hora serotina post completorium cantatum in dicta Lugdunensi ecclesia et postquam venerabilis pater religiosus vir frater Jocerandus de Laniaco abbas humilis Athanacensis Lugdunensis diocesis ordinis sancti Benedicti in dicto capitulo super compromisso facto ut dicebatur in eum de dicta administratione inter dictum dominum episcopum ex una parte et capitulum supradictum ex altera dixit proposuit et protestatus fuit ea que dicere proponere et protestari voluit et offerre anno die indictione et pontificatu predictis presentibus et ad hoc vocatis testibus et rogatis domino Henrico de Sartines canonico Sancti Justi Lugdunensis magistro Guillermo Baucheron domino Guidone de Botut canonico et procuratore dicti capituli et pluribus aliis ibidem existentibus