Charter Document - 02070063
| Charter Number: | 02070063 |
|---|---|
| Cartulary Title: | Cartulaire de l'Evêché d'Autun |
| Charter Language: | Latin |
| Charter Origin: | Religious |
| Charter Type(s): | Quittance |
| Date: | 1279 |
| Date type: | Internal, A.D., Feast |
| Resource Link(s): |
|
Charter:
Universis presentes litteras inspecturis nos Clarambaudus decanus et magister Nicolaus archidiaconus Eduensis notum facimus quod in nostra propter hoc presentia specialiter constitutus dominus Guillermus de Sedeloco miles filius quondam domini Gaufridi de Sedeloco militis deffuncti recognoscit ex certa scientia et confitetur publice coram nobis se habuisse et recepisse de reverendo in Christo patre Girardo Dei gratia Eduensi episcopo novies viginti et quatuor libras Turonensium occasione et racione vendicionis sue prepositure de Sedeloco et sui tamen quod habebat in emendis de Sedeloco et omnium rerum et jurium appendiciarum et pertinenciarum predicte prepositure quecumque sint et quocumque modo censeantur item domus sue site in castro de Sedeloco retro domum dicti episcopi et appendiciarum et pertinenciarum dicte domus item sue messerie de Sedeloco nemorum suorum et terrarum et omnium aliarum rerum quecumque sint et quocumque nomine censeantur quas habebat et habere poterat et debebat quocumque titulo seu racione in nundinis de Sedeloco que predicta erant et movebant de feodo domini episcopi supradicti Quam vendicionem omnium premissorum idem Guillermus asserit se fecisse predicto episcopo et suis successoribus de quibus etiam novies viginti et quatuor libris idem Guillermus predictum episcopum et suos successores quittat imperpetuum et absolvit In cujus rei testimonium ad preces et requisitionem ipsius Guillermi sigilla nostra litteris presentibus duximus apponenda Datum Edue et actum die dominica in quindena Penthecostes anno Domini millesimo CC septuagesimo nono mense junio