Charter Document - 02070062

Anno Domini millesimo ducentesimo septuagesimo octavo die sabbati ante Purificationem beate Marie Virginis in domo leprosarie de Vietello ubi Morinus quondam rector dicte domus infirmabatur cum timeretur de morte ipsius Morini inquisitum fuit per dominum Johannem de Argilego presbiterum reverendi in Christo patris Girardi Dei gratia episcopi Eduensis missum super hoc ad dictam domum a dicto domino episcopo habentem mandatum speciale a dicto domino episcopo inquirendi a dicto Morino super institutione rectoris dicte domus qui dictus Morinus juratus requisitus et diligenter examinatus dicit per juramentum suum quod ipse Morinus qui loquitur fuit rector institutus dicte domus leprosarie de Vietello a predicto domino episcopo et eidem contulit dictam domum cum bonis et pertinentiis dicte domus tanquam rectori ipsum investiendo corporaliter de eadem et mandavit tunc dictus episcopus ipsum Morinum induti de dicta domo et bonis ipsius in possessionem corporalem per dominum Petrum tunc archipresbiterum Flavigniacensem qui archipresbiter dictum Morinum induit corporaliter in possessionem dicte domus cum bonis et pertinentiis ejusdem prout receperat in mandatum Requisitus de loco dicit apud [Sanctum] Theobaldum in prioratu dicte ville Requisitus de tempore dicit quod viginti quinque anni sunt elapsi Requisitus si dictus Morinus dictam domum leprosariam tenuit pacifice et quiete per dictum tempus dicit quod sic Requisitus si tempore institutionis sue homines de Vietello vel alter institutionem dictam factam a domino episcopo de ipso Morino rectore contradixerunt seu aliquid juris reclamaverunt dicit quod non Ad hujusmodi inquisitionem presentes fuerunt et super hoc vocati testes qui secuntur videlicet dominus Regnaudus archipresbiter de Tullione et curatus de Vietello magister Guillermus de Vietello gerens vices archipresbiteri de Tullione dominus Johannes de Flavigniaco curatus de Arnayo dominus Petrus curatus de Aligneyo dominus Amorandus curatus de Bouceyo et dominus Radulphus rector leprosarie de Monte Sancti Johannis qui requisiti sigilla sua presentibus apposuerunt in testimonium veritatis Datum et actum anno et die predictis