Charter Document - 02070060

A touz çaus qui verront ou orront ces présentes lettres je Huguenins sires de Montperrous escuyers fiz çai en arrieres à noble homme mon soignor Phelippe de Borbon soignour de Montperrous fais à savoir que je tiens en fyé lige sus tous autres soignours de monsoignour l'avesque d'Ostun madite maison de Montperrous jurable et randauble et tout quant que je porte et tiens en la ville et ou paroichage de Grury soit en piaigez en hommes en tailles ou en queques autres choses que con soyent quant au jor de huy sauf lou més Mathier de Gehenne que mes pères devant diz conquist à son tans dou dit Mathier et de ses anfans Et si en tiens doudit mon soignour l'avesque lou paaige de Monpalais et les hommes que je hay an ladicte ville de Monpalais et lor més et lor appertenances et tous les hommes que je hai a Dos Eschaules et lor més et lor appertenances de rechief mes hommes de Seveler et lor més et lor appertenances et si en tiens mes hommes de Sonjon et lor més et lor appertenances et lou paiaige que je tiens et porte en la ville de Yssi dou grant chemin trespassant Et se ce estoit que messires l'avesques ou ses commandemanz trovissent aucunes choses obliées que je tenisse qui fuissient dou fyé monsoignour l'avesque et deussient estre je vuil et octroie que je et li mien les tenans an fié dou dit monsoignour l'avesque aussi comme les autres qui sunt ci dessus devisées sans ce que je ne li mien n'an fuissiens pris à achison Et je Jahanz de Blanos chevaliers sires de Usselles fais savoir à toz çaus qui verront ces présentes lettres que s'il advenoit que je ou li mien tenissiens en aucun tans la dicte maison de Montperrous ou les choses qui sont ci dessus nommées an tout ou en partie par la raison dou mariaige dou dit Huguenin et de ma fille je suis tenuz et promoz par mon sairement doné sus saintes évangiles de faire l'ommaige à monsoignour l'avesque d'Ostun por tant comme je porroie sauve la féauté de mes autres soignours et s'il avenoit que je ou li mien tenissiens riens des chouses dessus nommées en heritaige noz somes tenu et je lou promos et jurois por moy et por les miens de faire lou fyé et d'antrer an l'ommaige mon soignour l'avesque d'Ostun por tant et selon ceu que li fyé desdictes choses requiert An tesmoignaige de laquel chose je Jahanz de Blanos hai mis mon sael an ces présantes lettres et je Huguenins et je Jahanz dessus dit avons prié et requis à honoraubles personnes monsoignour Durant de Paluyel chantre maistre Nicholes archediacre et maistre Jehan de Borbon officiaul d'Ostun qu'il mettent lor seaus à ces présentes lettres an tesmoin de vertey Et noz Duranz chantres nos Nicholes archediacres d'Ostun nos seaus et nos Jehanz de Borbon officiaus d'Ostun lou seaul de la cort d'Ostun avons mis an ces présentes lettres à la prière et à la requeste des devant diz Huguenin et monsoignour Jehan de Blanos avec lou sien seaul an tesmoingnaige de verté Ce fu fait et donné an l'an de l'incarnacion Nostre Soignour mil daus cans et sexante et dis et uit lou juesdi après la feste de saint Phelipe et de saint Jaque ou mois de may