Charter Document - 02070054

Universis presentibus et futuris nos Hugo dominus de Colchis miles notum facimus quod cum reverendus in Christo pater Girardus Dei gratia episcopus Eduensis tradiderit deliberaverit et assignaverit domine Ysabelle filie nostre uxori quondam nobilis viri domini Philippi de Borbonio domini de Montperroux dotem suam in castro et terra de Montperrous ad bonos usus et consuetudines Burgundie quodquidem castrum et terra sunt et movent de feodo legio ipsius domini episcopi Eduensis nos pro nobis et pro dicta Ysabella filia nostra promittimus eidem domino episcopo Eduensi et tenemur per juramentum nostrum super sancta Dei evangelia a nobis corporaliter prestitum et sub ypotheca et expressa obligatione omnium bonorum nostrorum mobilium et immobilium eumdem dominum episcopum et suos ac successores suos in ecclesia Eduensi ac ipsam ecclesiam Eduensem super hoc erga dominum regem Francie et erga quascumque personas alias ecclesiasticas et seculares indempnem modis omnibus conservare et quicquid dampni et gravaminis et interesse propter hoc incurreret expensas et missiones quas propter hoc idem dominus episcopus vel sui faceret eidem vel suis plenarie resarcire vel quicquid dicta Ysabella de dicto castro et terra ipsius castri pro dicta dote sua teneret eidem domino episcopo vel suis in eo statu in quo est reddere tradere ac etiam deliberare ad hoc omnia nos et nostros expresse obligantes In cujus rei testimonium sigillum nostrum presentibus litteris duximus apponendum et rogavimus venerabilem virum officialem domini Theobaldi archidiaconi Belnensis ut ipse sigillum ipsius archidiaconi una cum nostro apponat presentibus ad majorem firmitatem Nos vero officialis predicti domini archidiaconi Belnensis sigillum ipsius archidiaconi presentibus litteris apposuimus ad requisitionem et preces ipsius Hugonis una cum suo in testimonium veritatis Datum die dominica post octabas Purificationis beate Marie Virginis anno Domini millesimo ducentesimo septuagesimo secundo mense februarii