Charter Document - 02070046

Girardus divina miseratione episcopus Eduensis gerens administrationem archiepiscopatus Lugdunensis ipsius sede vacante universis capellanis ecclesiarum parochialium ac ceteris cujuscumque religionis seu ordinis ecclesiarum prelatis in civitate et suburbio Lugdunensi constitutis salutem in Domino Jhesu Christo Cum inter alios memorande recordationis principes professionis fidei Christiane quadam speciali prerogativa inclite memorie Ludovicus quondam Francorum rex propter zelum devotionis et fidei ac fidei sanctitatem apud universos Christicolas commendabilis habeatur decet ecclesiasticam honestatem ut ubicumque corpus ipsius ac alia principum et nobilium corpora defferri contingerit condignis obsequiis ac debitis ecclesie suffragiis recipiantur ad honorem Dei et suarum subsidium animarum Vobis igitur auctoritate qua fungimur precipimus et mandamus quatinus cum predicta corpora ad civitatem defferri contingerit Lugdunensem ad cathedralem beati Johannis ecclesiam conveniatis ut dicta corpora ibidem valeamus recipere una vobiscum processionaliter et honeste Nos autem interdictum generale quod in dictam civitatem Lugdunensem tulimus justicia mediante ob honorem predictorum qui in obsequio Jhesu Christi diem clauserunt extremum et reverentia illustris viri Philippi Francorum regis quamdiu Lugduni fuerint quantum ad claustrum et ecclesiam cathedralem Lugdunensem tantummodo suspendimus seu etiam relaxamus volentes a die quo recedet dominus Philippus a civitate Lugdunensi predictam interdicti sententiam sicut prius observari firmiter et valere Interdictos tamen et excommunicatos in hac relaxatione volumus et intelligimus remotos penitus et exclusos Datum in Petra Scisa die jovis in vigilia apostolorum Philippi et Jacobi anno Domini MCC septuagesimo primo Reddite litteras sigillatas in signum receptionis earumdem