Charter Document - 02070045

Nos frater Rodulphus abbas et conventus Fonteneti Cisterciensis ordinis Eduensis diocesis notum facimus universis presentes litteras inspecturis quod cum Girardus Dei gratia Eduensis episcopus et capitulum ejusdem ecclesie ad supplicationem nostram nobis concesserint et voluerint quod nos fundare possimus parrochialem ecclesiam in proprio patrimonio ecclesie nostre Fontaneti scilicet in territorio Novillemontis ita quod jus patronatus ecclesie predicte spectabit ad nos rursum voluerunt idem episcopus et dictum capitulum ac concesserunt quod omnes decime et quicquid secundum consuetudinem diocesis Eduensis percipitur nomine decimarum similiter ad nos spectabit Iterum in signum et memoriam fundationis percipiemus annuatim in ecclesia predicta XX solidos Viennensium reddituales in festo Pasche Jura vero parrochialia consueta in aliis ecclesiis parrochialibus diocesis Eduensis spectabunt ad cappellanum ecclesie supradicte qui cappellanus dicti loci per me domino episcopo Eduensi et successoribus suis qui pro tempore fuerint episcopi Eduenses presentabitur et per ipsum dominum episcopum ad nostram presentationem si sit ydoneus incurabitur et instituetur in ecclesia antedicta Et quia dictus cappellanus non habeat in hac plantacione novella unde posset commode sustentari nos prefati abbas et conventus sibi providebimus in XV libris Viennesium annuatim donec redditus seu proventus jurium parrochialium predictorum summam dictarum XV librarum Viennensium valeant seu excedant ita tamen ut quod nisi infra dictam summam pro tempore prefata jura parrochialia valere poterint interim computabitur in XV libris supradictis et quod nos dictus dominus episcopus Eduensis et alii successores sui qui pro tempore fuerint episcopi Eduenses procurationem et visitationem suam ac omnia et singula jura episcopalia utriusque legis diocesane ac juridictionis in dicta ecclesia et parrochia sicut in aliis ecclesiis sue diocesis plenarie percipient et habebunt Nos promittimus et tenemur bona fide primam ecclesiam in dicto loco nostris sumptibus propriis et expensis construere et fundare et omnia et singula supradicta inviolabiliter observare et implere et nichil per nos vel per alium in predictis vel circa predicta immutare In cujus rei testimonium et munimen presentibus litteris sigillum nostrum duximus apponendum Datum et actum anno Domini MCCLXX mense aprili